ՌԴ Պետդուման որոշել է օրենսդրորեն պաշտպանել բարոյականությունը

ԵՐԵՎԱՆ, 15 հունվարի. /Նովոստի-Արմենիա/. ՌԴ Պետդուման որոշել է պաշտպանել բնակչության բարոյական առողջությունը՝ չդիմելով Հեռուստառադիոհեռարձակման ոլորտում բարոյականության պաշտպանության բարձրագույն խորհրդի ստեղծմանը, այլ դրա փոխարեն ընդունելով տասնչորս օրինագծերից բաղկացած համապատասխան փաթեթ, «ՌԻԱ Նովոստիին» տված հարցազրույցի ժամանակ տեղեկացրել է Պետդումայի մշակույթի հանձնաժողովի նախագահ Գրիգորի Իվլիևը։

Պետդումայի պատգամավորները չորեքշաբթի հավանության չեն արժանացրել օրինագիծը, որը ենթադրում է մշտական գործող պետական մարմնի՝ ՌԴ-ում հեռուստառադիոհեռարձակման ոլորտում բարոյականության պաշտպանության բարձրագույն խորհրդի ստեղծումը։

Փաստաթուղթը ներկայացված էր պալատի քննարկմանը դեռևս 2000 թ.-ին և նախատեսում էր, որ այդ խորհուրդը, որը պետք է ունենար 12 անդամ, կվերահսկի եթեր հեռարձակվող հեռուստառադիոհաղորդումներն ու զանգվածային այլ լրատվությունը։

«Բարոյականության պետական պաշտպանությանն ուղղված օրինագծերի փաթեթը, որը մշակվել է այլ հանձնաժողովների՝ այդ թվում նաև Ընտանիքի, կանանց և երեխաների հարցերի հանձնաժողովի հետ համատեղ, ծրագրվում է քննարկման ներկայացնել արդեն հաջորդ ամիս», - ասել է Իվլիևը։

Նրա խոսքերով, նոր նորմատիվային ակտերում «կոնկրետ կներկայացվեն բարոյականության պաշտպանության ուղղությամբ պետության պարտականությունները, կսահմանվի քաղաքացիների, առաջին հերթին երեխաների առողջության համար վնասակարար տեղեկատվությունը, ինչպես նաև կտրվի  սահմանված նորմերի խախտման համար պատասխանատվությունը»։

«Անհրաժեշտ է իրավունքների իրականացման մեխանիզմներ ստեղծել, որոնք ոչ մի դեպքում չեն սահմանափակի ստեղծագործության ազատությունը», - ավելացրել է նա։

Իվլիևի խոսքերով, անհրաժեշտ է գործի դնել քաղաքացիական ակտիվության մեխանիզմը՝ էկրաններից գռեհկությունը վերացնելու համար, «դաստիարակություն  իրականացնել տարբեր մակարդակներում, և պետք է սկսել երեխաներից»։

«Ինչ-որ բանի անբարոյական և բարոյական լինելը չի կարող որոշել մարդկանց մի խումբ, դա կարող է անել միայն հասարակությունը և միայն իրավական նորմերի շրջանակներում», - համոզված է գործակալության զրուցակիցը։-0-