Ցխինվալին հայտարարում է, որ Վրաստանը զորքեր է ուղարկում Հարավային Օսեթիայի սահման

Հարավային Օսեթիայի պաշտպանության նախարարությունն ուրբաթ հանրապետության սահմանում վրաց զորքերի ուժեղացում է նկատել, հաղորդում է հանրապետության տեղեկատվության և մամուլի  պետկոմիտեն՝ հղում անելով Հարավային Օսեթիայի պաշտպանության նախարարի տեղակալ Իբրահիմ Գասեևին։

«Հունվարի 9-ի առավոտյան Մերեթի գյուղի մոտ նկատվել է չորս միավոր զրահատեխնիկա և 16 բեռնատար ավտոմեքենա, Պրիսյան բարձունքների  սահմանամերձ գոտում։ Եթե հաշվի առնենք, որ յուրաքանչյուր մեքենայում կարող է լինել առնվազն քսան մարդ, ապա Վրաստանը Մերեթի է տեղափոխել առնվազն 300 զինվոր»,- ասել է Գասեևը, հաղորդում է ՌԻԱ Նովոստին։

Նա նշել է նաև, որ «նկատվել է նաև վրաց տեխնիկայի և զորքերի առկայություն Աթոցի, Կնոլևի և Դվանի գյուղերի մերձակայքում»։ Միևնույն ժամանակ Հարավային Օսեթիայի պաշտպանության նախարարի տեղակալը մտահոգություն է հայտնել սահմանամերձ գոտիներում Եվրամիության դիտորդների դիրքորոշման առնչությամբ:

«Տարակուսանք է հարուցում ԵՄ դիտորդների դիրքորոշումը։ Ինչու՞ նրանց չի հետաքրքրում այն հարցը, թե ինչու է վրացական կողմը զորքեր տեղափոխում օսական սահմանի մոտ։ Վերջին դեպքերի լույսի ներքո մեզ համար անհասկանալի է ԵՄ դիտորդների տեղն ու դերը»,- ասաց Գասեևը։

Նա ընդգծել է, որ, իր կողմից, Հարավային Օսեթիան ուշադիր հետևում է իր սահմանների մոտ ընթացող գործողությունները և պատրաստ է ցանկացած անակնկալների։ «Եթե վրացական կողմը սադրանքներ է պատրաստում, ապա, մինչ դրանց իրագործմանն անցնելը թող մտածի հնարավոր հետևանքների մասին»,- ընդգծել է Հարավային Օսեթիայի պաշտպանության նախարարի տեղակալը։ -0-