Ժիրինովսկին առաջարկում է Իրան ներմուծել С-400 ԶՀՀ՝ ԱՄՆ-ի կողմից հնարավոր օդային հարվածներից պաշտպանվելու համար

ԵՐԵՎԱՆ, 5 սեպտեմբերի./Նովոստի-Արմենիա/. Ռուսաստանի լիբերալ-ժողովրդավարական կուսակցության (ՌԼԺԿ) առաջնորդ Վլադիմիր Ժիրինովսկին առաջարկում է Իրան ներմուծել ռուսական գերժամանակակից զենիթա-հրթիռային С-400 համակարգեր (ԶՀՀ)՝ ԱՄՆ-ի կողմից հնարավոր օդային հարվածներից պաշտպանվելու համար, հաղորդում է «ՌԻԱ Նովոստին»։

«Պետք է որքան հնարավոր է արագ Իրան տանել С-400-ը, որպեսզի նրանք փակեն իրենց երկինքը»,- ասաց Ժիրինովսկին՝ Պետդումայի լիագումար նիստի ժամանակ։

Ինչպես ավելի վաղ հայտնել էր լոնդոնյան «Սանդեյ թայմս» թերթը՝ հղում անելով Նիքսոնի կենտրոնի ազգային անվտանգության հարցերով ամերիկացի փորձագետ Ալեքսիս Դեբետին, Պենտագոնը ծրագրել է Իրանում 1200 թիրախների ուղղությամբ զանգվածային օդային հարվածներ իրականացնել։ Այդ ծրագրի նպատակը, համաձայն պարբերականի տեղեկատվության, երեք օրվա ընթացքում իրանական բանակը լիովին մարտունակությունից զրկելն է։

Ինչպես կարծում է Ժիրինովսկին, դեպքերի նման զարգացման դեպքում ողջ հարավային Անդրկովկասում իրավիճակը կանկայունանա, ինչը բոլորովին չի համընկնում Ռուսաստանի շահերի հետ։

С-400 ԶՀՀ-ն նախատեսված է բոլոր տեսակի օդային սարքերի՝ ինքնաթիռներին,  առանց օդաչուի օդային տեխնիկային և թևավոր հրթիռներին հարվածելու համար։  Աէրոդինամիկական թիրախներին հարվածելու համալիրի առավելագույն հեռավորությունը մոտ 400 կիլոմտեր է, բարձրությունը՝ ավելի քան 30 կիլոմետր։ --0—