ԵՐԵՎԱՆ, 25 մայիսի./Նովոստի-Արմենիա/. ՀՀ վարչապետ Կարեն Կարապետյանն իր ներդրումն է ունեցել Հայաստանում կառուցվող աշխարհի ամենաերկար Zip Line-ի շինարարությանը և արդեն իր ընտանիքի համար ատրակցիոնի տոմսեր է ձեռք բերել:
Գրեթե 2,7 կմ երկարություն ունեցող աշխարհում ամենաերկար Zip Line ատրակցիոնը կկառուցվի Տավուշի մարզի Ենոքավան գյուղում: Մայիսի 4-ից քրաուդֆանդինգային միջազգային Indiegogo հարթակում սկսվել է շինարարության իրականացման համար նախատեսված դրամահավաքը։
«Համոզված եմ, որ շուտով այս կարևոր նախաձեռնությունն իրականություն է դառնալու: Կարծում եմ, որ աշխարհի մասշտաբով ռեկորդակիր այս նախագիծն էական հիմք կհանդիսանա սահմանամերձ Տավուշի մարզում զբոսաշրջության զարգացման, Ենոքավան համայնքում երիտասարդների համար նոր աշխատատեղերի ստեղծման և համայնքային կյանքի աշխուժացման համար»,- Facebook-ի իր էջում գրել է Կարապետյանը:
Նա կոչ է անում միանալ նախաձեռնությանը, որի իրականացումը հնարավորություն կտա Հայաստանը ներկայացնել որպես տարածաշրջանի էքստրեմալ զբոսաշրջության կենտրոն և երկիրն առավել ճանաչելի դարձնել օտարերկրացի զբոսաշրջիկների շրջանում:
Загружается новость ...
"Право"
Ավելի վաղ «Yell Extreme Park» նախագծի հիմնադիր Տիգրան Չիբուխչյանը հաղորդել էր, որ նախագծի իրականացման համար անհրաժեշտ է 200 մլն դոլար:
«Yell Extreme Park» նախագիծը հիմնվել է 2015 թ-ին Տավուշի մարզի Ենոքավան գյուղում: Վայրն ընտրվել է, քանի որ այն ամենահարմարավետն է կլիմայական պայմանների, աշխարհագրական դիրքի և ռելիեֆային առանձնահատկությունների տեսանկյունից:
Նախագծի նպատակն է Հայաստանում զարգացնել արկածային և էքստրեմալ զբոսաշրջությունը, սահմանամերձ շրջաններում ստեղծել նոր աշխատատեղեր, աշխուժացնել հասարակական կյանքը և խթանել առողջ ապրելակերպին: -0-