ՀՀԿ–ն քննարկում է Կարեն Կարապետյանի թեկնածությունը վարչապետի պաշտոնում

ԵՐԵՎԱՆ, 8 սեպտեմբերի. /Նովոստի–Արմենիա/. Հայաստանի հանրապետական կուսակցությունը քննարկում է Կարեն Կարապետյանի թեկնածությունը վարչապետի պաշտոնի համար, հինգշաբթի լրագրողներին ասաց Հայաստանի Ազգային ժողովի արտաքին կապերի մշտական հանձնաժաղովի ղեկավար Արտակ Զաքարյանը գործադիր մարմնի և ՀՀԿ Խորհրդի նիստից առաջ։

Նա միաժամանակ նշեց, որ այլ թեկնածություններ չկան։

Հինգշաբթի կառավարության նիստում Հայաստանի վարչապետ Հովիկ Աբրահամյանը հայտարարեց հրաժարականի մտադրության մասին` իր որոշումը բացատրելով պետական կառավարման հարցում նոր մոտեցումների կիրառման անհրաժեշտությամբ։

Գրեթե տասը տարի Կարապետյանը գլխավորում էր Հայաստանին ռուսական գազի մենաշնորհային մատակարար Հայռուսգազարդ ընկերությունը։

2010-2011 թվականներին Կարապետյանը զբաղեցրել է Երևանի քաղաքապետի պաշտոնը, բայց, լքելով այն, տեղափոխվեց Մոսկվա` զբաղեցնելով «Գազպրոմբանկի» առաջին փոխնախագահի պաշտոնը։

Զաքարյանի խոսքով, նոր կառավարությունը կդիմակայի նոր մարտահրավերներին։ Նա նաև չբացառեց ազգային համաձայնության կառավարության ձևավորումը։

Այն հարցին, թե որքան ժամանակ Կարեն Կարապետյանը կզբաղեցնի վարչապետի պաշտոնը, Զաքարյանն ասաց, որ անկախ նրանից, թե ով է Հայաստանի վարչապետը, նա կաշխատի առնվազն մինչև խորհրդարանական ընտրություններ, որոնք նշանակված են 2017 թվականի ապրիլին, ընդգծելով, որ «նոր կառավարությունը ժամանակավոր կոչել չի կարելի»։

Կառավարության հրաժարականի` Երևանում ՊՊԾ գնդի գրավման հետ կապելու վերաբերյալ հարցին խորհրդարանական հանձնաժողովի ղեկավարը նշեց, որ կառավարության փոփոխությունը պայմանավորված է նոր լուծումների որոնմամբ։

«Կառավարման համակարգը պետք է արձագանքի բնակչության կարիքներին»,– ասաց նա։

Հովիկ Աբրահամյանը ստանձնել է ՀՀ վարչապետի պաշտոնը 2014 թ.-ի ապրիլին: Որպես Աբրահամյանի հավանական հետևորդ նշվում է Կարեն Կարապետյանը` Երևանի նախկին քաղաքապետը (2010-2011 թթ.-ին), «ՀայՌուսԳազարդ» ՓԲԸ-ի նախկին գլխավոր տնօրենը (ներկայիս «Գազպրոմ Արմենիա» ՓԲԸ-ն, ռուսական «Գազպրոմի» 100%-անոց դուստ ընկերությունը), ով վերջերս զբաղեցնում է Մոսկվայում «Գազպրոմբանկի» առաջին փոխնախագահի պաշտոնը: -0-