Հայաստանի կրթության ոլորտն այդքան էլ չի համապատասխանում աշխատաշուկային. փորձագետ

ԵՐԵՎԱՆ, 30 հունվարի. /Նովոստի-Արմենիա/. Հայաստանի կրթության ոլորտը բավարար չի համապատասխանում ներկայիս աշխատաշուկային, կարծում է Հայաստանի աշխատանքի ազգային ինստիտուտի և սոցիալական հետազոտությունների ինստիտուտի տնօրեն Արման Սարգսյանը։

Ինչպես նշեց Սարգսյանը երկուշաբթի մամուլի ասուլիսում, ներկայացնելով «Զբաղվածության և կրթության փոխկապակցվածության խնդիրները Հայաստանի աշխատաշուկայում» հետազոտությունը, հայկական բուհերի առաջարկած մաանագիտացումները հիմնականում պահանջված չեն աշխատաշուկայում։

«Մասնագիտացումները, որ ստանում են հայ ուսանողների մեծամասնությունը, չեն համապատասխանում Հայաստանում գործատուների առաջարկած հիմնական թափուր աշխատատեղերին։ Այսօր առավել պահանջված են համարվում այնպիսի մասնագիտությունները, ինչպիսիք են` մեխանիզատորը, վարորդը, վարսավիրը»,– ընդգծեց Սարգսյանը։

Նա ավելացրեց, որ Հայաստանի ողջ տարածքում ուսումնասիրության շրջանակում անցկացվել է հարցում, որին մասնակցել է 2.5 հազար գործատու, 522 ուսանող և 195 դասախոս 34 կրթական հաստատություններից։

«Մեր կարծիքով, Հայաստանը որոշակի փոփոխությունների կարիք ունի կրթության ոլորտում` ներկայիս աշխատաշուկայի իրողություններին ավելի համապատասխանելու համար»,– նշեց Սարգսյանը։

Բացի այդ, ինչպես ցույց է տվել անցկացված ուսումնասիրությունը, Հայաստանի ուսանողների 29 տոկոսն ուսմանը զուգահեռ աշխատում է։ Միաժամանակ, հարցվածների 75 տոկոսը նշել է, որ երբեք չի գործակցել կրթական հաստատությունների հետ։

Ուսումնասիրության համաձայն, վերջին երեք տարիների ընթացքում գործատուների կողմից աշխատանքի վերցրած 16-29 տարեկան երիտասարդների թիվը տարեկան աճել է մոտ 13.1 տոկոսով։ Հարցված գործատուների 67 տոկոսի մոտ աշխատավարձը կազմել է 55-100 հազար դրամ, 21.3 տոկոսի մոտ` 100-150 հազար դրամ, 150 հազար դրամից ավելի իրենց աշխատողներին վճարում է գործատուների միայն 4.6 տոկոսը։

Հարցված գործատուների մոտ 27 տոկոսը նշել է, որ իրենց չի հաջողվում լրացնել առկա աշխատատեղերը, իսկ 54 տոկոսն ասել է, որ ստիպված է աշխատանքի վերցնել կրթության ավելի ցածր մակարդակով մասնագետների, քան պահանջվում էր։ -0-