Հատուկ նշանակության ջոկատը ՔԿ է տեղափոխել հայ փոխմարզպետի որդու սպանության կասկածյալին (ՏԵՍԱՆՅՈՒԹ)

ԵՐԵՎԱՆ, 11 հունվարի. /Նովոստի–Արմենիա/. Գեղարքունիքի փոխմարզպետի որդու սպանության կասկածյալ Մեխակ Հարությունյանը չորեքշաբթի տեղափոխվել է Քննչական կոմիտե։

Ինչպես հայտնում է shamshyan.com կայքը, կասկածյալին ուղեկցել է Քրեական հետախուզության գլխավոր վարչության և Կազմակերպված հանցավորության դեմ պայքարի գլխավոր վարչության հատուկ ջոկատը։

Ավելի ուշ կընտրվի Հարությունյանի խափանման միջոցը։

Հունվարի 8–ին ոստիկանության հասարակայնության հետ կապի և մամուլի վարչության ղեկավար Աշոտ Ահարոնյանը հայտնել էր, որ Քրեական հետախուզության գլխավոր վարչության և Գեղարքունիքի մարզային վարչության աշխատակիցների իրականացրած օպերատիվ–հետախուզական միջոցառումների, ինչպես նաև որոնողական և բացատրական աշխատանքների արդյունքում, Քրեական հետախուզության գլխավոր վարչություն է ներկայացել Մեխակ Հարությունյանը, ով կասկածվում էր դրա նախօրեին Նորաթուս գյուղի բնակիչ Հայկ Հակոբյանի` Գեղարքունիքի փոխմարզպետ Անդրանիկ Հաոբյանի որդու սպանության մեջ:

28-ամյա տղամարդը գնդակահարվել է հունվարի 7-ին Գավառ քաղաքում: Դեպքի վայրում հայտնաբերվել է «Մակարովի» ատրճանակի 7 պարկուճ: Քրեական գործ է հարուցվել «սպանություն» և «ապօրինի զենք պահելը» հոդվածներով:

Մահացածը քրեական աշխարհում հայտնի Ալիկ և Արա Բանդուրյանների զարմիկն էր: -0-