Գրքի տոնը՝ Կառավարությունում. ԿԳՄՍ նախարարը գրքեր է նվիրել նիստի մասնակիցներին
ԵՐԵՎԱՆ, 19 փետրվարի․/Նովոստի-Արմենիա/․ Գիրք նվիրելու օրվա առթիվ այսօր Կառավարության նիստի մեկնարկին ԿԳՄՍ նախարար Ժաննա Անդրեասյանը գրքեր է նվիրել նիստի բոլոր մասնակիցներին։
Նախարարը նշել է, որ ընթերցանության խրախուսումը Կառավարության քաղաքականության շատ կարևոր և առաջնահերթ ուղղություն է։
«Այսօր Հովհաննես Թումանյանի ծննդյան օրն է և արդեն ավելի քան 15 տարի է, ինչ այս օրը Հայաստանում նշվում է, որպես գիրք նվիրելու օր։ Այս կապակցությամբ մեր նախարարությունը կառավարության նիստի բոլոր մասնակիցներին փոխանցել է գրքեր, որոնք տարբեր տարիներին հրատարակվել են պետության աջակցությամբ»,-ասել է նախարարը։
Նրա խոսքով, նախորդ տարի գրքի փառատոնին 18 հազար գրքի վաճառք ենք ունեցել, որը 33 տոկոսով ավելի է, քան դրա նախորդ տարի, և փառատոնին 40 հազար մասնակից, որը 2023 թվականի համեմատ ավելի քան կրկնապատկվել է։
Նախարարի խոսքով՝ այս ցուցանիշը վկայում է, որ ընթերցանության և գրքի նկատմամբ հետաքրքրությունը մեր երկրում մեծանում է։
