Գլխավոր դատախազությունը պահանջում է ՀՀ ԱԺ պատգամավոր Իշխան Սաղաթելյանից բռնագանձել շուրջ 700 հազ. ԱՄՆ դոլարին համարժեք դրամի անշարժ և շարժական գույքեր

ԵՐԵՎԱՆ, 10 փետրվարի. /Նովոստի-Արմենիա/. Գլխավոր դատախազությունը պահանջում է ՀՀ ԱԺ պատգամավոր Իշխան Սաղաթելյանից հօգուտ ՀՀ-ի բռնագանձել անշարժ և շարժական գույքեր, շուրջ 700 հազար ԱՄՆ դոլարին համարժեք դրամ։

Այս մասին հայտնում է Գլխավոր դատախազությունը։

Նշվում է, որ հակակոռուպցիոն դատարանը վարույթ է ընդունել Գլխավոր դատախազության՝ ապօրինի ծագում ունեցող գույքի բռնագանձման վերաբերյալ հերթական հայցադիմումը:

Գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին՝ ՀՀ Ազգային ժողովի պատգամավոր Իշխան Վաչիկի Սաղաթելյանից և նրան փոխկապակցված անձանցից հօգուտ Հայաստանի Հանրապետության բռնագանձել՝

-5 անշարժ գույք.

-5 տրանսպորտային միջոց.

-3 իրավաբանական անձանցում մասնակցություն.

-264 միլիոն 516 հազար դրամ՝ որպես ապօրինի դրամական միջոցների մնացորդ.

-2 միլիոն 914 հազար դրամ, որը չի հիմնավորվում անձի օրինական եկամուտներով, ունի ապօրինի ծագում, փոխանցվել է բարեխիղճ ձեռքբերողի կամ հնարավոր չէ նույնականացնել և բռնագանձել։