Երևանյան բանտում անկարգություններ կազմակերպած քրեական հեղինակությանը նոր պատիժ է սպառնում
ԵՐԵՎԱՆ, 10 հունիսի. /Նովոստի–Արմենիա/. Քրեական հեղինակություն Արմեն Ալեքսանյանին, ով մայիսի սկզբին անկարգություններ էր կազմակերպել «Նուբարաշեն» ՔԿՀ-ում, նոր պատիժ է սպառնում։
Ինչպես հայտնում է ՔԿ մամուլի ծառայությունը, քննությամբ պարզվել է, որ ՀՀ ԱՆ «Նուբարաշեն» քրեակատարողական հիմնարկի թիվ 48 խցի կալանավոր, քրեական հեղինակություն համարվող Արմեն Ալեքսանյանը, տեղեկանալով ՀՀ հատուկ քննչական ծառայության և ՀՀ ոստիկանության կազմակերպված հանցավորության դեմ պայքարի գլխավոր վարչության աշխատակիցների կողմից դատարանի որոշման հիման վրա հիշյալ խցում խուզարկություն կատարելու մտադրության մասին, այն խափանելու նպատակով, քրեկատարողական հիմնարկում պահվող կալանավորված և դատապարտված անձանց հրահրել է իրականացնել զանգվածային անկարգություններ:
«Ալեքսանյանի հնչեցրած կոչերից հետո նույն քրեակատարողական հիմնարկի տարբեր խցերում պահվող կալանավորված և դատապարտված անձինք վիրավորել և սպառնալիքներ են հնչեցրել իրավապահ և արդարադատության համակարգի ծառայողների հասցեին, այրել են և խցերի դռների կերակրադռնակներից միջանցք նետել վառվող բարձեր, ներքնակներ, սրբիչներ և այլ իրեր»,– ասվում է հաղորդման մեջ։
Զանգվածային անկարգության մասնակիցները ոտքերով հարվածել են խցերի դռներին, կոտրել փականները և դուրս գալով խցերից՝ մետաղյա ձողերով ու այլ առարկաներով վնասել տվյալ մասնաշենքի միջանցքում առկա գույքը, չեն ենթարկվել իշխանության ներկայացուցիչ հանդիսացող ՀՀ ԱՆ «Նուբարաշեն» քրեակատարողական հիմնարկի աշխատակիցների՝ զանգվածային անկարգությունները դադարեցնելու վերաբերյալ օրինական պահանջներին՝ սպառնալով նրանց նկատմամբ կյանքի և առողջության համար վտանգավոր բռնություն գործադրել, հայտնում են մամուլի ծառայությունից։
Ձեռք բերված ապացույցների հիման վրա՝ 2016թ. հունիսի 3-ին որոշում է կայացվել՝ Արմեն Ալեքսանյանին ՀՀ քրեական օրենսգրքի 225-րդ հոդվածի 1-ին մասով որպես մեղադրյալ ներգրավելու մասին:
Նախաքննությունը շարունակվում է։ Ձեռնարկվում են անհրաժեշտ քննչական գործողություններ՝ անկարգությունների մասնակիցների շրջանակը պարզելու, նրանցից յուրաքանչյուրի գործողություններն անհատականացնելու ուղղությամբ։
Դեպքի վայրի զննությամբ առգրավվել են զանգվածային անկարգությունների ընթացքում կոտրված կերակրադռնակների և խցերի դռների փականքները, նշանակվել է դատահետքաբանական և ապրանքագիտական համալիր փորձաքննություն, օպերատիվ-հետախուզական միջոցառումներ ձեռնարկելու նպատակով հետաքննության մարմնին տրվել համապատասխան հանձնարարություն: -0-
