ԵԱՀԿ նախագահը հույս է հայտնել, որ Հայաստանի և Ադրբեջանի միջև խաղաղության համաձայնագիրը շուտով կստորագրվի
ԵՐԵՎԱՆ, 15 հոկտեմբերի․ /Նովոստի-Արմենիա/․ ԵԱՀԿ գործող նախագահ, Շվեյցարիայի Համադաշնության արտաքին հարաբերությունների դաշնային դեպարտամենտի ղեկավար Իգնասիո Կասիսը հույս է հայտնել, որ Հայաստանի և Ադրբեջանի միջև խաղաղության համաձայնագիրը շուտով կստորագրվի:
Ինչպես հայտնում է ՀՀ կառավարության մամուլի ծառայությունը, այս մասին նա հայտարարել է Հայաստանի վարչապետ Նիկոլ Փաշինյանի հետ հանդիպման ժամանակ:
Կասիսը ողջունել է Հայաստանի և Ադրբեջանի միջև խաղաղության հաստատումը՝ ընդգծելով դրա կարևորությունը:
Իր հերթին Փաշինյանը ներկայացրել է տարածաշրջանում տեղի ունեցող վերջին զարգացումները՝ նշելով, որ Ադրբեջանի հետ խաղաղության համաձայնագրի ստորագրումն ու վավերացումը Հայաստանի կառավարության բացարձակ առաջնահերթությունն են:
Հանդիպման ընթացքում կողմերը քննարկել են նաև հայ-շվեյցարական հարաբերությունները:
Փաշինյանն ընդգծել է դրանց հետևողական զարգացման կարևորությունը և բարձր մակարդակի փոխայցելությունների կազմակերպման անհրաժեշտությունը:
Կասիսը, իր հերթին, նշել է, որ Շվեյցարիան նույնպես մեծ տեղ է հատկացնում Հայաստանի հետ քաղաքական, տնտեսական և հումանիտար կապերի զարգացմանը:
Զրուցակիցները մտքեր են փոխանակել երկուստեք հետաքրքրություն ներկայացնող հարցերի շուրջ:
