Այդ գործընթացը վաղուց է տեղի ունեցել. Փաշինյանը՝ ընդդիմության համախմբման վերաբերյալ Կարապետյանի հայտարարությունների մասին
ԵՐԵՎԱՆ, 18 հունիսի․/Նովոստի Արմենիա/․ ՀՀ վարչապետ Նիկոլ Փաշինյանը մեկնաբանել է «Ուժեղ Հայաստան» կուսակցության առաջնորդ, «Տաշիր Գրուպ» հոլդինգի նախագահ Սամվել Կարապետյանի կոչը՝ ընդդիմադիր ուժերի համախմբման և հետընտրական կոալիցիա ստեղծելու վերաբերյալ։
«Համախմբումը նոր չի տեղի ունեցել, այդ համախմբումը վաղուց է տեղի ունեցել, ուղղակի չէին հայտարարում, որ ժողովրդի տրամադրությունը չընկնի», -լրագրողների հետ ճեպազրույցի ժամանակ հայտարարել է Փաշինյանը։
Նրա կարծիքով՝ ընդդիմադիր տարբեր ուժեր փաստացի գործում են որպես մեկ միասնական ամբողջություն։
« Այդ ուժերը նույն ուժն են՝ նույն կետից կառավարվող, նույն սկզբունքների հիման վրա գործող», -ասել է վարչապետը։
Փաշինյանը չի հստակեցրել, թե հատկապես որ քաղաքական ուժերին նկատի ունի և որ կենտրոնն է համակարգում նրանց գործունեությունը։
