Երևանի քաղաքապետարանի դիմաց բողոքի ակցիա է. ծնողները բողոքում են մանկապարտեզներում ընդունելության ոչ պատշաճ կազմակերպման դեմ (ՎԻԴԵՈ)
ԵՐԵՎԱՆ, 8 փետրվարի./Նովոստի–Արմենիա/. Այսօր ծնողներն ակցիա են կազմակերպել Երևանի քաղաքապետարանի դիմաց` բողոքելով մանկապարտեզներում ընդունելության ոչ պատշաճ կազմակերպման դեմ։
Ինչպես նշում են ծնողները, մանկապարտեզներում ընդունելություն չի կազմակերպվում, նրանք ամենուր դիմել են`քաղաքապետարան, համայնքապետարան, մանկապարտեզներ, բոլորը տարբեր պատասխաններ են տալիս, նշում տարբեր ժամկետներ և չեն կանչում:
Ծնողների խոսքերով, կա մոտ 12 հազար երեխա, որոնք հերթի մեջ սպասում են։ Նրանք նշում են, որ այս իրավիճակը խնդիրներ է առաջացնում, և ծնողները չեն կարողանում աշխատանքի գնալ, ստիպված են տանը մնալ։
Ծնողներին մոտեցավ Երևանի քաղաքապետի մամուլի խոսնակ Հակոբ Կարապետյանը։ Նա նշեց, որ քաղաքապետարանը տեղյակ է խնդրից, քայլեր են ձեռնարկվում մանկապարտեզներում հավելյալ տեղեր և խմբեր ավելացնելու համար:
Կարապետյանը նշեց, որ խնդիրը լուծմանը մոտ է և առաջիկայում հարցին ինչ-որ լուծում կտրվի:
Կարապետյանի արձագանքը չգոհացրեց ծնողներին։ Նրանք նշեցին, որ այդպիսի պատասխաններ նրանք շատ են լսել, բայց որևէ կոնկրետ քայլ չի ձեռնարկվում։ Ոչ բոլոր ծնողներն են ի վիճակի երեխային տալ մասնավոր մանկապարտեզ, իսկ պետական ընդունվելու համար ստիպված են տարիներով սպասել։–0–
