Երեքշաբթի` հունիսի 4–ի կարևոր նորությունների հնգյակը (ՎԻԴԵՈ)

ԵՐԵՎԱՆ, 5 հունիսի./Նովոստի–Արմենիա/. «Նովոստի–Արմենիա» գործակալությունը ներկայացնում է երեքշաբթի` հունիսի 4–ի կարևոր նորությունների սեփական տարբերակը։

• Պրահայի քաղաքային դատարանը թույլ է տվել Հայաստանի նախկին նախագահ Սերժ Սարգսյանի եղբորորդու` Նարեկ Սարգսյանի արտահանձնումը Հայաստան։ Արտահանձնման վերաբերյալ վերջնական որոշում պետք է ընդունի Չեխիայի արդարադատության նախարար Մարիա Բենեշովան։ Միաժամանակ արդարադատության նախարար Արտակ Զեյնալյանը մեկնաբանել է Սերժ Սարգսյանի եղբորորդու արտահանձնման հետ կապված իրավիճակը։

• Կառավարության կառուցվածքային փոփոխություններով պայմանավորված՝ վերակազմակերպված նախարարություններում շարունակվում է փոփոխությունների և վերանշանակումների գործընթացը: Ինչպես հայտնում է վարչապետի մամուլի ծառայությունը, վարչապետի որոշմամբ, մի շարք փոխնախարարներ են նշանակվել վերակազմավորված նախարարություններում։ Եվ այսպես, Իրինա Ղափլանյանը նշանակվել է շրջակա միջավայրի փոխնախարարի պաշտոնում։ Արևիկ Անափիոսյանը, Գրիշա Թամրազյանը և Արայիկ Խզմալյանը նշանակվել են կրթության, գիտության, մշակույթի և սպորտի փոխնախարարների պաշտոնում։ Գեղամ Վարդանյանը նշանակվել է բարձր տեխնոլոգիական արդյունաբերության փոխնախարար։ Արտակ Քամալյանը և Ավագ Ավանեսյանը նշանակվել են էկոնոմիկայի նախարարի տեղակալների պաշտոնում։ Լիլիա Շուշանյանը, Բագրատ Բադալյանը և Հակոբ Վարդանյանը նշանակվել են տարածքային կառավարման և ենթակառուցվածքների փոխնախարարների պաշտոնում։

• Մարտի 1–ի տուժածները փոխհատուցում կստանան։ Համապատասխան օրինագիծն այսօր երկրորդ և վերջնական ընթերցմամբ ընդունվեց Ազգային ժողովի կողմից։ Ըստ օրինագծի, փոխհատուցում կարող են ստանալ այդ դեպքերի հետևանքով մահացների իրավահաջորդները, ինչպես նաև միջին և ծանր վնասվածքներ ստացողները: Փոխհատուցման չափը դեռ սահմանված չէ, այդ հարցի շուրջ կառավարությունում քննարկումներ կանցկացվեն:

• Հունիսի 4–ին վարչապետ Նիկոլ Փաշինյանը ելույթ է ունեցել «Կորպորասիոն Ամերիկա» ընկերության ղեկավարության համաժողովի ժամանակ։ Իր ելույթի ընթացքում վարչապետը նշել է օդային փոխադրումների կարևորությունը Հայաստանի համար, քանի որ երկիրը կիսաշրջափակված իրավիճակում է։ «Այս պայմաններում օդային տրանսպորտը չափազանց կարևոր նշանակություն ունի: Անշուշտ, ուրախալի է, որ այս ոլորտում արդեն կան դրական արդյունքներ, և մենք ապագային ավելի լավատեսական օրակարգով ենք նայում», – ընդգծել է Նիկոլ Փաշինյանը։

• Ազգային ժողովը երեքշաբթի նիստին երկրորդ և վերջնական ընթերցմամբ հաստատել է «Զինվորական ծառայության և զինծառայողների կարգավիճակի մասին» օրենքում փոփոխություններ կատարելու օրինագիծը: Օրինագծի ընդունմանը կողմ է քվեարկել է 114 պատգամավոր, ձեռնպահ և դեմ քվեարկողներ չեն եղել: Մասնավորապես, կառավարության կողմից առաջարկվող օրինագիծը նախատեսում է «Պատիվ ունեմ» ծրագրի շրջանակում կրճատել զինծառայություն կրելու նվազագույն ժամկետները` 3–ից դարձնելով 2 տարի։ Բացի այդ, փոփոխություններով առաջարկվում է բաձրացրնել տարիքային շեմը` 36–ից դարձնելով 40, իսկ հատուկ կարևոր կամ հազվագյուտ մասնագիտությունների դեպքում` անգամ մինչև 45 տարեկան։–0–