ԵՐԵՎԱՆ, 4 հունիսի. /Նովոստի-Արմենիա/. Հայաստանի խորհրդարանը երեքշաբթի նիստին երկրորդ և վերջնական ընթերցմամբ ընդունել է պատգաավորների առաջարկը` 2008 թ.-ի մարտի 1-2 իրադարձությունների հետևանքով տուժածներին փոխհատուցման տրամադրման մասին:
Օրինագծի ընդունման օգտին քվեարկել է 104 պատգամավոր, ձեռնպահ և դեմ քվեարկողներ չեն եղել:
Ըստ օրինագծի, փոխհատուցում կարող են ստանալ այդ դեպքերի հետևանքով մահացների իրավահաջորդները, ինչպես նաև միջին և ծանր վնասվածքներ ստացողները:
Ինչպես հայտնում է «Նովոստի-Արմենիա» գործակալության թղթակիցը, նախատեսվում է, որ աջակցությունը կարող է ոչ միայն ֆինանսական լինել, այլ նաև ցուցաբերվի բժշկական կամ հոգեբանական օգնություն: Փախհատուցման չափը դեռ սահմանված չէ, այդ հարցի շուրջ կառավարությունում քննարկումներ կանցկացվեն:
Փոխհատուցում ստանալու հիմնավորում կդառնան դատաբժշկական տեղեկանքները, որոնք տուժածները պետք է ստացած լինեին 2008 թ.-ին: Այդ ընթացքում արտերկիր արտագաղթած ՀՀ քաղաքացիներն ինքնուրույն պետք է որոշեն` դիմեն փոխհատուցում ստանալու համար, թե ոչ:
Միաժամանակ, առաջին և երկրորդ ընթերցումների միջև օրինագծում որոշակի փոփոխություններ են կատարվել: Այսպես, տուժած ոստիկանները, որոնք հետագայում «Մարտի 1-ի» գործի շրջանակում ենթարկվել են քրեական հետապնդման, չեն ստանա աջակցություն:
«Աջակցությունից կկարողանան օգտվել այն մարդիկ, ովքեր իրենց մասնագիտական պարտականությունները կատարելիս ստացել են վնասվածքներ, սակայն իրենց մասնակցությամբ այդ գործողությունների ընթացքում չեն ենթարկվել քրեական հետապնդման կամ իրենց նկատմամբ չի իրականացվել քրեական հետապնդում կամ քրեական հետապնդումը դադարեցվել է արդարացման հիմունքի վրա», - հայտարարեց փոփոխությունների նախաձեռնող, «Իմ քայլը» խմբակցության պատգամավոր Սիսակ Գաբրիելյանը:
Հայկական ընդդիմությունը` առաջին նախագահ Լևոն Տեր–Պետրոսյանի գլխավորությամբ, ով առաջադրվել էր 2008 թ.–ի փետրվարի 19–ին կայացած նախագահական ընտրություններին և պարտվել էր, փետրվարի 20–ից Երևանի կենտրոնում անցկացնում էր հանրահավաքներ` դժգոհություն հայտնելով քվեարկության արդյունքներից։ Բողոքի ակցիաները 2008 թ.–ի մարտի 1–2–ը վերածվեցին անկարգությունների և իրավապահ ուժերի ու ցուցարարների միջև բախումների, ինչի հետևանքով զոհվեց 10 մարդ, ավելի քան 200–ը վիրավորվեց։ -0-
