ԵՐԵՎԱՆ, 17 ապրիլի․/Նովոստի–Արմենիա/․ ԱԺ պատգամավոր Հակոբ Ասլանյանի հետ միջադեպի մասնակից Սամվել Վարդանյանի նկատմամբ իրավապահ մարմինների կատարած գործողությունները հնարավոր չէ այլ կերպ բնութագրել, քան իշխանության ամենավերին օղակներից հրահանգված արտադատարանական հաշվեհարդար, նշվում է Հայ ազգային կոնգրեսի (ՀԱԿ) հայտարարության մեջ։
«Նիկոլ Փաշինյանի ռեժիմի այս վերջին գործողությունը, մարդու երեսին ԱԺ նախագահ Ալեն Սիմոնյանի թքելու ամոթալի պատմությունը, քաղաքական հակառակորդներին բռնաճնշումներով և ապօրինի քրեական հետապնդումներով լռեցնելու վերջերս հաստատված պրակտիկան, նույն մեթոդներով ՏԻՄ մարմիններում ընդդիմության կողմից ձևավորված իշխանության յուրացումը ցույց են տալիս Հայաստանի ներկա իշխանությունների բացահայտ արհամարհանքը մարդու իրավունքների և արժանապատվության, խոսքի ազատության և ժողովրդավարության հիմնարար նորմերի նկատմամբ։
Իշխանություններն, ըստ էության, ցուցադրում են, որ ընտրել են ժողովրդավարության կազմաքանդման և ավտորիտարիզմի վերահաստատման ուղին և պատրաստ են ամեն օր հատել նորանոր կարմիր գծեր», – նշվում է հայտարարության մեջ։
Գնահատելով կատարվածը որպես վտանգավոր սահմանի հատում, Հայ Ազգային Կոնգրեսը կոչ է անում ժողովրդավարական արժեքներին հավատարիմ քաղաքացիներին, հասարակական կազմակերպություններին և քաղաքական ուժերին վճռականորեն ընդվզել և դիմակայել երկրում բռնատիրական կարգերը վերականգնելու Փաշինյանի ռեժիմի բացահայտ փորձերին։
«Սամվել Վարդանյանի գործի վերաբերյալ մենք նաևպահանջում ենք Գլխավոր դատախազից՝ կատարել օրենքի և ժողովրդավարության պաշտպանության հետ կապված սահմանադրական պարտավորությունները, բացահայտել ու պատժել մարդու իրավունքները և արժանապատվությունը ոտնահարող այս արտադատարանական հաշվեհարդարի պատվիրատուներին և կատարողներին», – նշվում է ՀԱԿ–ի հայտարարության մեջ։
Ապրիլի 15-ին հասարակական տրանսպորտում տեղի է ունեցել միջադեպ։ Քաղաքացի Սամվել Վարդանյանը, տեսնելով ՔՊ-ական պատգամավոր Հակոբ Ասլանյանին, ասել է. «Հակահայ վիժվա՞ծք, մարդամեջ եք հելնում դո՞ւք»: «Ապուշ ե՞ս, արա՛, թող իջնեմ»,- արձագանքել է պատգամավորը և հրել քննադատող ուղևորին: Նույն օրը հայտնի է դարձել, որ ոստիկանությունը ձերբակալել է քաղաքացիական ակտիվիստ Սամվել Վարդանյանին՝ խուլիգանության մեղարանքով։ Ավելի ուշ Վարդանյանի փաստաբանները հայտնեցին, որ Վարդանյանը ծեծի է ենթարկվել Քննչական կոմիտեից ոստիկանության Ձերբակալվածների պահման վայր տեղափոխվելու ճանապարհին։
Քաղաքացիական հագուստով և դիմակներով երկու տղամարդ ավտոմեքենայից դուրս են բերել ձեռնաշղթաներով կապված Վարդանյանին, ծեծել, վիրավորել և նվաստացրել։ Մի քանի րոպե անց նրանց են մոտեցել ուղեկցող ոստիկանները և Վարդանյանին տեղափոխել Ձերբակալվածների պահման վայր։ Ապրիլի 17–ին Վարդանյանին առաջադրվել է մեղադրանք ոչ միայն խուլիգանության, այլև քաղաքական հայացքներով պայմանավորված՝ թշնամանք հրահրելու հոդվածով։ Ոստիկանությունից հայտնում են, որ Վարդանյանի միջադեպի հետ կապված նշանակվել է ծառայողական քննություն։
Ծանոթացեք լուրերին առաջինն ու քննարկեք դրանք մեր Telegram-յան ալիքում