Քրեական վարույթ է նախաձեռնվել Սամվել Վարդանյանի նկատամմբ բռնություն կատարելու վերաբերյալ հաղորդմա առթիվ

ԵՐԵՎԱՆ, 18 ապրիլի․/Նովոստի–Արմենիա/․ ՀՀ քննչական կոմիտեն ստացել է հանցագործության մասին հաղորդում այն մասին, որ 2024թ․ ապրիլի 15-ին, երեկոյան, համապատասխան քննչական գործողությունը կատարվելուց հետո Ոստիկանության ծառայողների ուղեկցությամբ ձերբակալվածների պահման վայր տեղափոխվելու ընթացքում, առերևույթ խուլիգանության հատկանիշներով նախաձեռնված քրեական վարույթով հանցավոր արարք կատարելու հիմնավոր կասկածանքով ձերբակալված անձ Ս․ Վարդանյանը ենթարկվել է բռնությունների, կատարվել են նրա արժանապատվությունը նսեմացնող գործողություններ, հաղորդում է ՀՀ ՔԿ–ն։

Նշված հաղորդման առթիվ ՀՀ քննչական կոմիտեի հատկապես կարևոր գործերի քննության գլխավոր վարչության խոշտանգումների և պաշտոնատար անձանց կողմից բռնություն գործադրելով լիազորությունները չարաշահելու կամ անցնելու հանցագործությունների քննության վարչությունում ՀՀ քրեական օրենսգրքի 450-րդ հոդվածի 2-րդ մասի 7-րդ կետի հատկանիշներով նախաձեռնվել է քրեական վարույթ։ Ս․ Վարդանյանը ճանաչվել է տուժող։
 
Իրականացվում է նախաքննություն՝ դեպքի հանգամանքները պարզելու, հաղորդման մեջ նշված տեղեկությունները վարույթի շրջանակներում ստուգելու և իրավական գնահատականներ տալու նպատակով։

Հիշեցնենք, որ ապրիլի 15-ին հասարակական տրանսպորտում տեղի է ունեցել միջադեպ։ Քաղաքացի Սամվել Վարդանյանը, տեսնելով ՔՊ-ական պատգամավոր Հակոբ Ասլանյանին, ասել է. «Հակահայ վիժվա՞ծք, մարդամեջ եք հելնում դո՞ւք»: «Ապուշ ե՞ս, արա՛, թող իջնեմ»,- արձագանքել է պատգամավորը և հրել քննադատող ուղևորին: Նույն օրը հայտնի է դարձել, որ ոստիկանությունը ձերբակալել է քաղաքացիական ակտիվիստ Սամվել Վարդանյանին՝ խուլիգանության մեղարանքով։ Դեպքի օրը ԱԺ խոսնակ Ալեն Սիմոնյանը գրառում է կատարել Telegram–ի իր ալիքում՝ հայտարարելով, որ Սամվել Վարդանյանի խուլիգանական արարքը շատ արագ արժանանալու է օրենքի ամենախիստ արձագանքին։

«Այսօր մի ոչնչություն իրեն թույլ է տվել խուլիգանական արարք հանրային տրանսպորտով երթևեկող ՀՀ ԱԺ պատգամավոր 69-ամյա Հակոբ Ասլանյանի նկատմամբ, ով, ի դեպ, երեք պատերազմի մասնակից է: Այս խուլիգանական արարքը շատ արագ արժանանալու է օրենքի ամենախիստ արձագանքին, թող հանկարծ որևէ մեկը չկասկածի», – նշել է Սիմոնյանը։

 Ավելի ուշ Վարդանյանի փաստաբանները հայտնել են, որ Վարդանյանը ծեծի է ենթարկվել և խոշտանգվել Քննչական կոմիտեից ոստիկանության Ձերբակալվածների պահման վայր տեղափոխվելու ճանապարհին։

Քաղաքացիական հագուստով և դիմակներով երկու տղամարդ ավտոմեքենայից դուրս են բերել ձեռնաշղթաներով կապված Վարդանյանին, ծեծել, վիրավորել և նվաստացրել։ Մի քանի րոպե անց նրանց են մոտեցել ուղեկցող ոստիկանները և Վարդանյանին տեղափոխել Ձերբակալվածների պահման վայր։ Ապրիլի 17–ին Վարդանյանին առաջադրվել է մեղադրանք ոչ միայն խուլիգանության, այլև քաղաքական հայացքներով պայմանավորված՝ թշնամանք հրահրելու հոդվածով։ Ոստիկանությունից հայտնում են, որ Վարդանյանի միջադեպի հետ կապված նշանակվել է ծառայողական քննություն։ Դատարանի որոշմամբ Վարդանյանի նկատմամբ որպես խափանման միջոց է ընտրվել տնային կալանքը և գրավը՝ 7մլն. դրամի չափով։

Ծանուցում. հանցանքի համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: