Առավոտից Գորիսից դեպի Որոտան ճանապարհի մի հատվածը փակ է. Սյունիքի փոխմարզպետն ու Կապանի քաղաքապետը ներկայացնում են ստեղծված իրավիճակը
ԵՐԵՎԱՆ, 26 օգոստոսի./Նովոստի–Արմենիա/. Գորիսից դեպի Որոտան տանող ճանապարհի մի հատվածը առավոտից փակ է:
Այս մասին «Ազատություն» ռ/կ–ի հետ զրույցում ասել է Սյունիքի փոխմարզպետ Նարեկ Բաբայանը:
«Իմ ունեցած տեղեկություններով՝ հիմա բանակցություններ են, բայց չեմ կարող ասել, թե ինչի շուրջ», – ասել է Նարեկ Բաբայանը։
Այսօր ավելի վաղ Կապանի քաղաքապետ Գևորգ Փարսյանը հայտնել է, որ այսօր սպասվում են բանակցություններ:
«Դա մեր սահմանապահ զորքերի վերահսկողության տակ գտնվող հատվածն է: Զինբանակցություններին ներկա են լինելու հայկական կողմի սահմանապահներ, ռուս սահմանապահներ և ադրբեջանական կողմից պետք է լինեն»,-ասել է քաղաքապետը «Ազատություն» ռ/կ–ին:
Գևորգ Փարսյանը հավելել է նաև, որ Ադրբեջանի նպատակը, հնարավոր է, խորքային լինի: Սակայն դեռ չկան հստակ պահանջներ, չկան բանակցություններ, պարզապես նման սցենարներ նախկինում էլ շատ են եղել:
«Նախկինում էլ եկել են իրանք իրանց տեղակայվել են ինչ-որ հատվածում, երբ պետք է եղել բանակցել, սկսել են օրերով, շաբաթներով, ամիսներով բանակցությունները ձգձքել», – ասել է քաղաքապետը:
Հայաստանի ազգային անվտանգության ծառայությունը հինգշաբթի հաղորդեց, որ օգոստոսի 25-ին, ժամը 23: 00-ի սահմաններում, ադրբեջանական կողմը փակել է Կապան-Գորիս միջպետական ճանապարհի Կարմրաքար-Շուռնուխ հատվածը: Այսօր հայտնի դարձավ, որ Ադրբեջանը փակել է նաև Գորիսից Որոտան տանող ճանապարհը։–0–
