2025թ․–ին ռուտին պատվաստումների ցուցանիշը ռեկորդային է` 95.2 %․ նախարար
ԵՐԵՎԱՆ, 11 փետրվարի․/Նովոստի–Արմենիա/․ 2025 թվականին ռուտին պատվաստումների ցուցանիշը ռեկորդային է` 95.2 %, որն իսկապես շատ դրական արդյունք է։
Այս մասին այսօր իր ասուլիսի ժամանակ հայտնել է ՀՀ առողջապահության նախարար Անահիտ Ավանեսյան։
«Պատվաստանյութերի վերաբերյալ հանրության հետ իրականացվող տեղեկատվական աշխատանքը տալիս է իր արդյունքները, և ես շատ ուրախ եմ, որ մեր հանրության վերաբերմունքը ևս փոխվել է», - ասաց Ավանեսյանը:
Անդրադառնալով կարմրուկի բռնկումներին՝ նախարարը հայտնեց, որ վարակը հաղթահարելու ամենագործուն միջոցը պատվաստումն է։
Ավանեսյանը շեշտեց, որ կարմրուկը խիստ վարակիչ և կոնտագիոզ հիվանդություն է։
«Եթե մեկ շենքում կարմրուկով վարակված երեխա կամ անձ կա, ապա հավանականությունը, որ այդ շենքում մյուս բնակիչները՝ անգամ առանց հանդիպելու, կվարակվեն, իսկապես շատ մեծ է»,- նշեց նախարարը։
Ավանեսյանը հիշեցրեց, որ թեև 2023 թվականին եղել են հիվանդության բերովի դեպքեր, սակայն ձեռնարկված միջոցառումները թույլ են տվել կանխել դրանց տարածումը։
Նախարարը տեղեկացրեց նաև, որ Հայաստանն անցել է վեցավալենտ պատվաստանյութի կիրառմանը, և այս բոլոր միջոցառումները հնարավորություն են տալիս, որպեսզի նույնիսկ բերովի դեպքերի պարագայում դրանք արագ տեղայնացվեն և բռնկումներ չդառնան։
