ԵՐԵՎԱՆ, 16 մայիսի. /Նովոստի-Արմենիա/. «Ալյանս» կուսակցության նախագահ, ԱԺ պատգամավոր Տիգրան Ուրիխանյանը խոստանում է հանդես գալ բացահայտող հայտարարությամբ «Անալիտիկ» կայքի և դրա հետ կապակցված այլ կայքերի վերաբերյալ, որոնք նրա գրասենյակի հաղորդագրության մեջ անվանվում են հանցավոր խումբ:
Այս մասին նշվում է պատգամավորի Facebook–յան էջում հրապարակված հաղորդագրության մեջ:
Ուրիխանյանը մանրամասները կներկայացնի երեքշաբթի խորհրդարանում քաղաքական հայտարարությունների ժամին: Նա խոստանում է տեղեկություններ տրամադրել նաև նշված ինտերնետ ռեսուրսների հովանավորների վերաբերյալ:
Analitik.am հայկական տեղեկատվական կայքի տնօրեն Անի Հովհաննիսյանին և նրա աշխատակից Վարդիթեռ Գիշյանին մայիսի 7–ին մեղադրանք է ներկայացվել Ուրիխանյանին շանտաժի ենթարկելու համար:
Հայկական լրատվական կայքերից մեկի տնօրենը և նրա օգնականը ձերբակալվել են շանտաժի համար>>
Նախաքննությամբ պարզվել է, որ analitik.am լրատվական կայքի տնօրենը կայքում ՀՀ ԱԺ պատգամավորի անձի, ընտանիքի անդամների, ինչպես նաև վերջինիս գործունեությանը վերաբերող սուտ տեղեկատվություններ, զրպարտություններ և վարկաբեկիչ այլ նյութեր հրապարակելու կապակցությամբ հանդիպումներ է ունեցել նրա հետ, և նմանօրինակ հրապարակումները չդադարեցնելու և հետագայում նույնաբովանդակ այլ հոդվածներ հրապարակելու սպառնալիքով՝ իրենից պահանջել է յուրաքանչյուր ամիս վճարել 300 հազ. ՀՀ դրամ:
Քրեական գործի նախաքննության ընթացքում analitik.am լրատվական կայքի գործադիր տնօրեն Անի Հովհաննիսյանին և Վարդիթեր Գիշյանին մեղադրանք է առաջադրվել ՀՀ քրեական օրենսգրքի 182-րդ հոդվածի 2-րդ մասի 2-րդ կետով (շորթում` մի խումբ անձանց կողմից, նախնական համաձայնությամբ): Վերջիններիս նկատմամբ, դատարանի որոշմամբ, որպես խափանման միջոց ընտրվել է կալանավորումը: -0-
