Կրիշտիանու Ռոնալդուն լքել է Սաուդյան Արաբիան Էր Ռիադի վրա իրանական հերթական հարձակումից հետո (ՖՈՏՈ)
ԵՐԵՎԱՆ, 4 մարտի․/Նովոստի–Արմենիա/․ Պորտուգալիայի հավաքականի և Սաուդյան Արաբիայի «Ալ Նասրա» ակումբի ֆուտբոլիստ Կրիշտիանու Ռոնալդուի ինքնաթիռը Սաուդյան Արաբիայից մեկնել է Մադրիդ՝ Էր Ռիադում ԱՄՆ դեսպանատան վրա անօդաչու թռչող սարքի հարձակումից հետո:
Նրա անձնական ինքնաթիռը երկուշաբթի վաղ առավոտյան Սաուդյան Արաբիայից մեկնել է Իսպանիայի մայրաքաղաք՝ Էր Ռիադում ԱՄՆ դեսպանատան վրա անօդաչուների հարձակումից հետո:
Այս մասին հայտնում է euronews.com-ը՝ հղում անելով բրիտանական Daily Mail-ին, որն էլ իր հերթին հիմնվել է Flightradar24 հարթակից ստացված տեղեկատվության վրա, ըստ որի՝ ֆուտբոլիստի Bombardier Global Express-ը Էր Ռիադից մեկնել է երեկոյան ժամը 8-ի սահմաններում և կեսգիշերից հետո վայրէջք կատարել Իսպանիայում՝ թռչելով Եգիպտոսի և Միջերկրական ծովի վրայով:
Պորտուգալացին, որը հանդես է գալիս Սաուդյան Արաբիայի առաջնության «Ալ-Նասր» ակումբում, լքել է երկիրը այն բանից հետո, երբ Ասիայի ֆուտբոլի կոնֆեդերացիան կարգադրել է դադարեցնել խաղերը՝ Իրանի վրա Իսրայելի և ԱՄՆ-ի հարձակումներից հետո Պարսից ծոցում բռնկված հակամարտության պատճառով:
Մերձավոր Արևելքում հակամարտության սրման պատճառով հետաձգված խաղերից մեկը ԱՖԿ Չեմպիոնների լիգայի քառորդ եզրափակիչի «Ալ-Նասր» - «Ալ-Վասլ» հանդիպումն է:
Էր Ռիադը, որտեղ Ռոնալդուն ապրում է իր հարսնացուի՝ Ջորջինա Ռոդրիգեսի և հինգ երեխաների հետ, անցած գիշեր դարձել է իրանական հարձակումների թիրախ, ընդ որում՝ թիրախներից մեկը եղել է ԱՄՆ դեսպանատունը:
