Միհրան Հարությունյանը կպարգևատրվի որպես ոսկե մեդալակիր, իսկ բողոքարկման հարցը դեռ պարզ չէ. ՀԱՕԿ

ԵՐԵՎԱՆ, 23 օգոստոսի. /Նովոստի–Արմենիա/. Մրցավարական կանխակալության պատճառով Օլիմպիադայում արծաթե մեդալի արժանացած հունահռոմեական ոճի ըմբիշ Միհրան Հարությունյանը Հայաստանում կպարգևատրվի որպես օլիմպիական ոսկե մեդալակիր, իսկ բողոքարկման հարցը դեռ պարզ չէ, նշել է ՀԱՕԿ նախագահ Գագիկ Ծառուկյանի մամուլի խոսնակ Իվետա Տոնոյանը:

 «Ինչպես ամբողջ միջազգային հանրության, հեղինակավոր լրատվամիջոցների, այնպես էլ Հայաստանի ազգային օլիմպիական կոմիտեի ու նրա նախագահի համար Միհրան Հարությունյանը հաղթող է և ոսկե մեդալակիր: ՀԱՕԿ նախագահ Գագիկ Ծառուկյանը որոշել է, որ Հայաստանում Միհրան Հարությունյանին դիմավորելու և պարգևատրելու են որպես ոսկե մեդալակրի: Խոսքը և՛ գումարային պարգևի, և՛ մնացած արտոնությունների մասին է», – նշել է Տոնոյանը, հաղորդում է tert.am–ը։

Ըմբիշ Միհրան Հարությունյան. ոչ թե ինձ կողոպտեցին, այլ իմ ազգը (ՏԵՍԱՆՅՈւԹ)>>

Այն հարցին, թե Միհրան Հարությունյանի նկատմամբ մրցավարական կազմի վարվելակերպը բողոքարկվելո՞ւ է և ինչպե՞ս է ընթացակարգը, Իվետա Տոնոյանը պատասխանել է, որ ինքն այս պահի դրությամբ տեղեկություն չունի։

«Այս պահին Գագիկ Ծառուկյանը Հայաստանում չէ, ինքս նույնպես գտնվում եմ արձակուրդում, և այդ առնչությամբ դեռևս տեղեկություն չունեմ», – նշել է Տոնոյանը։

Հունահռոմեական ոճի ըմբիշ Միհրան Հարությունյանը (66 կգ) չկարողացավ նվաճել օլիմպիական «ոսկին» կանխակալ մրցավարության պատճառով։

Սերբ Դավոր Շտեֆանեկի հետ գոտեմարտն ավարտվեց 1։1 հաշվով։ Մրցավարը երկրորդ ռաունդում միավոր տվեց սերբին իբր Հարությունյանի պասիվության պատճառով։ Հայ մարզիկն ու նրա մարզիչները չհամաձայնվեցին այդ որոշման հետ։ Այդուհանդերձ, հաղթող ճանաչվեց սերբ ըմբիշը։–0–