ԵՐԵՎԱՆ, 11 ապրիլի. /Նովոստի-Արմենիա/. Խորվաթիայում Եվրոպայի առաջնությանը հաջողությամբ հանդես եկած հայ ծանրորդները մայիսից կսկսեն նախապատրաստվել աշխարհի առաջնությանը, երեքշաբթի լրագրողներին ասաց Հայաստանի ծանրամարտի ֆեդերացիայի գլխավոր քարտուղար, ծանրամարտի տղամարդկանց հավաքականի գլխավոր մարզիչ Փաշիկ Ալավերդյանը:
«Առաջին ուսումնամարզական հավաքները նախատեսված է անցկացնել մայիսին Ուկրաինայում, որտեղ նոր սպորտբազա է կառուցվել` ֆինանսական առումով մեզ համար հասանելի: Դրանից հետո երկու-երեք հավաք կանցկացվի արդեն Հայաստանում, ապա Կազանում, որտեղ մենք արդեն եղել ենք մինչ Օլիմպիական խաղերը և որի սպորտբազանա լիովին բավարարում է մեր պահանջները», - ասաց Ալավերդյանը:
Ծանրամարտի աշխարհի առաջնությունը տեղի կունենա 2017 թ.-ի նոյեմբերի 28-ից դեկտեմբերի 5-ը ԱՄՆ-ում, որտեղ Հայաստանի հավաքականը առաջնությունից 15-20 օր առաջ նախատեսում է անցկացնել վերջին հավաքը:
«Մենք երբե ք չենք մեկնում առաջնությունների առանց ակնկալիքների», - ընդգծեց Ալավերդյանը:
«Մեր տղաները հոյակապ հանդես եկան Եվրոպայի առաջնությանը: Քանի որ Օլիմպիական խաղերից հետո շատ դժվար է վերականգնվել, ուստի նման կարճ ժամանակում այսպիսի արդյունքները հերոսություն են», - հայտարարեց Ալավերդյանը:
Եվրոպայի առաջնության և Ռիո-2016-ի արծաթե մեդալակիր Գոռ Մինասյանն իր հերթին ավելացրեց, որ կանի հնարավոր ամեն ինչ` իր արդյունքները բարելավելու համաև, մասնավորապես «հրում» վարժությունում: «Մենք պետք է անենք հնարավոր ամեն ինչ` առաջին եռյակում տեղ զբաղեցնելու համար», - ասաց մարզիկը: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում