ԵՐԵՎԱՆ, 22 փետրվարի. /Նովոստի–Արմենիա/. Սոցցանցերի հայ օգտատերերը նախօրեին բուռն քննարկում էին Ադրբեջանի նախագահ Իլհամ Ալիևի որոշումը` իր կնոջը երկրի առաջին փոխնախագահ նշանակելու վերաբերյալ։
Facebook–ում հայտնվել են բազմաթիվ մեկնաբանություններ, հրապարակումներ և նույնիսկ ծաղրանկարներ` նվիրված պետության ղեկավարի այս որոշմանը։
Հայ օգտատերերի առաջին կատակն այս թեմայով «House of cards» հայտնի սերիալն էր։ «Հավանաբար, դիտել է «House of cards»–ը և իրեն Անդերվուդ է կարծել։ Անդերվուդ Իլհամ Հեյդարի»։ Իսկ որոշ օգտատերեր պարզապես որոշել են, որ Ալիևը չի սպասել «Թղթե տնակ»–ի նոր եթերաշրջանին և թողարկել է սեփական տարբերակը։
«Ամենատարածված հարցը սա է դարձել. «Իսկ դու ի՞նչ ես արել քո կնոջ համար Սիրահարների օրվա կամ մարտի 8–ի առթիվ», ընդ որում, նմանատիպ մեկնաբանություններն ուղեկցվում են «love is…» մաստակի` «Սերը... Սահմանադրությունը նրա համար փոխելն է» նկարով։
Տարածում են գտել նաև «Մելանիա Թրամփի աևձագանքը Մեհրիբան Ալիևայի նշանակմանը» ադրբեջանական ծաղրանկարի վերահրապարակումները։ Պատկերի վրա Մելանիա Թրամփը դիմում է հեռուստացույցով Մեհրիբանի նշանակումը դիտող ամուսնուն` Դոնալդ Թրամփին, հետևյալ խոսքերով. «Տես, նա իրական իշխանությամբ է օժտված»։
Որոշ օգտատերեր ավելի խորն են մոտեցել հարցին` ներկայացնելով Ադրբեջանի «Կոռուպցիայի դեմ պայքարի մասին» օրենքի դրույթը, որտեղ 7–րդ գլխի 7.1 հոդվածում ասվում է, որ պաշտոնատար անձինք չեն կարող նշանակել մտերիմ հարազատներին անմիջապես իրենց ենթակա պաշտոնների` բացառությամբ, օրենսդրությամբ նախատեսված ընտրական և այլ պաշտոնների։ Որպես վերոնշյալի շարունակություն` ընդունվել է 7.2 հոդվածը։
«7.1 հոդվածը խախտած անձինք պարտավորվում են տվյալ իրավախախտման հայտնաբերումից հետո 30–օրյա ժամկետում կամավոր չեղարկել այս դրույթը` ենթակա անձին տեղափոխելով այլ պաշտոնի։ Եթե դա հնարավոր չէ, ապա տվյալ անձանցից մեկը պարտավորվում է լքել զբաղեցրած պաշտոնը»,– ասվում է օրենքում։ «Իլհամը ստիպված է հեռանալ ։(»,- մեկնաբանում են օգտատերերը։ -0-