Փոքրիկ հրաշք. ամերիկացի գաճաճ ամուսինները երեխա են որդեգրել Հայաստանից (ՎԻԴԵՈ)

ԵՐԵՎԱՆ, 29 նոյեմբերի./Նովոստի–Արմենիա/. FOX31 ամերիկյան հեռուստաալիքը պատմել է ԱՄՆ Կոլորադո նահանգում բնակվող ամուսնական զույգի մասին, ովքեր գաճաճ տղա են որդեգրել Հայաստանից։

Բրենթն ու Քելսի Հարիսները փոքրիկին առաջին անգամ տեսել են Հայաստանի մանկատներից մեկում, սակայն ստիպված են եղել վերադառնալ ԱՄՆ` խոստանալով անպայման կրկին այցելել։

Եվ ահա հավաքելով անհրաժեշտ բոլոր փաստաթղթերը` զույգը վերադարձել է տղայի հետևից` նրան որդեգրելու համար։

«Հիշում եմ, երբ առաջին անգամ նա ինձ մայրիկ անվանեց, դա իսկապես յուրահատուկ էր ինձ համար», – ասել է Քելսին հեռուստաալիքին տված հարցազրույցում։

Ռեպորտաժում նշվում է, որ Հարիսների ընտանիքը GoFundMe կայքում գործարկել է բարեգործական արշավ` հետապնդելով երեք նպատակ` բարելավել Հայաստանի մանկատների պայմանները, օգնել գաճաճ երեխաներին ընտանիք գտնելու հարցում և վերջապես օգնել երեխաների ճամփորդությունների ծախսերի փոխհատուցման հարցում։–0–