34 հազ. դրամ` «Զվարթնոց» օդանավակայանից կենտրոն հասնելու համար. միջադեպի շուրջ քննարկումները չեն դադարում (ՖՈՏՈ)

ԵՐԵՎԱՆ, 12 դեկտեմբերի./Նովոստի-Արմենիա/. Այսօր համացանցում հայ օգտատերերի ուշադրության կենտրոնում է ցեղասպանագետ Սուրեն Մանուկյանի Facebook-յան գրառումը Գերմանիայի քաղաքացու հետ կատարված միջադեպի առնչությամբ:

Սուրեն Մանուկյանն իր գրառմանը կից հրապարակել է տաքսի ծառայության վճարի կտրոնը, որտեղ երևում է որ ուղևորը, այս դեպքում Գերմանիայի քաղաքացին, վճարել է 34 հազ. դրամ (մոտ 70$) «Զվարթնոց օդանավակայանից» մինչև Հանրապետության հրապարակ հասնելու համար: Նշենք, որ նման ուղևորությունը կարող է արժենալ առնվազն 3-4 հազ. դրամ (մոտ 6-8$):

«Սա ոչ թե նախընտրության հարց է, այլ Հարկայինի զբաղվելու թեմա: Նշում եմ ՀՀ Զբոսաշրջության կոմիտե/Tourism Committee of RA-ին, որ փորձենք միասին հասկանալ, ինչ կարելի է անել, քանի որ իմ մոտ լրիվ «իսպանական ամոթ» է, երբ որ դու ոչ մի բանում մեղավոր չես, բայց ուրիշի փոխարեն ահավոր անհարմար ես զգում»,- գրել է նա իր Facebook-յան էջում: 

Համացանցում առաջացած աղմուկից հետո Մանուկյանը խմբագրել է իր գրառումն` ավելացնելով, որ իր նշած աղբյուրին վստահում է 100 տոկոսով: Նա նաև նշել է, որ նման իրավիճակում են հայտնվել նաև իր Facebook–յան ընկերներից ոմանք:

Միջադեպին արձագանքել է նաև «Զվարթնոց» օդանավակայանը` հայտարարելով, որ լուսանկարում երևացող կտրոնը կեղծ է։

«2019 թվականի փետրվարի 1-ից «Զվարթնոց» միջազգային օդանավակայանի՝ տաքսի ծառայություն մատուցող միակ պաշտոնական գործընկերը Yandex Taxi ընկերությունն է, որի գնացուցակը փակցված է օդանավակայանում»,- հաղորդվում է «Զվարթնոց» միջազգային օդանավակայանի Facebook-յան էջում:

Նշվում է, որ օդանավակայանի ղեկավարությունը մշտապես բարձրաձայնել է օդանավակայանում առկա նման խնդրի մասին և դիմել պատկան մարմիններին` խնդրով զբաղվելու և կեղծարարությամբ զբաղվողներին բացահայտելու համար: -0-