ՆԱՍԱ–ն հակված է Միջազգային տիեզերակայանում վթարի կեղծ ազդանշանի վարկածին
ԵՐԵՎԱՆ, 14 հունվարի. /Նովոստի–Արմենիա/. ՆԱՍԱ–ն հակված է Միջազգային տիեզերակայանում վթարի կեղծ ազդանշանի վարկածին, ՆԱՍԱ–ի կայքում հայտնել է Հյուսթոնում թռիչքների կառավարման կենտրոնի տեսահեռարձակման մեկնաբանը, հաղորդում է ՌԻԱ Նովոստին։
«Ամեն ինչ նորմալ է կարծես։ Հավանաբար, կեղծ ազդանշան էր։ Մենք աշխատում ենք հենց այն ուղղությամբ, որ դա կարող էր կեղծ տագնապ լինել»,– ասել է եթերի մեկնաբանը։
ՆԱՍԱ–ի ներկայացուցչի խոսքով` ճնշման կտրուկ աճ է գրանցվել սառեցման համակարգի կոնտուրներից մեկում։
«Գործելով շատ զգույշ` մենք հանձնարարեցինք անձնակազմի անդամներին մեկուսանալ ռուսական հատվածում»,– ավելացրել է նա։
«Ամերիկյան հատվածի սարքավորումների մի մասն անջատվել է, բայց այժմ կրկին միացվում է»,– ավելացրել է նա։ Գերատեսչության ներկայացուցիչը պարզաբանել է, որ տագնապի ազդանշանը կարող էր ճնշման բարձրացման, խափանված սենսորի կամ համակարգչային համակարգում առկա խնդրի հետևանք լինել։
ՆԱՍԱ–ի թռիչքների վերահսկողության ներկայացուցիչ Ջիմ Քելին հայտնել է, որ տագնապի պատճառը պարզվում է։
«Մենք առաջվա պես ուսումնասիրում ենք, թե ինչ է կատարվել։ Մասամբ վստահ ենք, որ ամոնիակի արտահոսք է եղել»,– ասել է նա։ Քելին ենթադրել է, որ խոսքը սենսորների և համակարգչային համակարգի հետ «կապված խնդիրներն են», որոնք կեղծ ազդանշանի պատճառ են դարձել։ Այժմ համակարգում ճնշումը մի փոքր բարձրանում է, բայց նոր թռիչքաձև աճի մասին խոսք լինել չի կարող, նշել է նա։
Միջազգային տիեզերակայանի ամերիկյան հատվածում Երևանի ժամանակով 12։44–ի սահմաններում սառեցման համակարգից վնասակար նյութերի արտանետում է եղել կայանի մթնոլորտ։ Այժմ ՄՏԿ–ի ամերիկյան հատվածը մեկուսացվել է, անձնակազմին վտանգ չի սպառնում, այն ռուսական հատվածում է։ ՄՏԿ ռուսական հատվածի մթնոլորտում խառնուրդների խտությունը թույլատրելիի սահմաններում է, չորեքշաբթի հայտնել է Ռոսկոսմոսը։
ՄՏԿ–ում այժմ հերթապահում են տիեզերագնացներ Ալեքսանդր Սամոկուտյաևը, Անտոն Շկապլերովը և Ելենա Սերովան, ամերիկացիներ Բարի Ուիլմորը (անձնակազմի ղեկավար) և Թերի Վերստը, ինչպես նաև Եվրոպական տիեզերական գործակալության աստղաբան Սամանտա Կրիստոֆերտին։ -0-
