Արեգակի պլազմայի արտանետումը հասել է Երկիր, բայց մագնիսական փոթորիկ չի առաջացրել

Արեգակի վրա շաբաթ երեկոյան տեղի ունեցած պլազմայի արտանետումը երեքշաբթի լույս գիշերը հասել է Երկիր, բայց առաջացրել է միայն թույլ ցնցումներ երկրային մագնիսոլորտում, որոնք չեն հասել մագնիսային փոթորկի մակարդակի, վկայում են ԱՄՆ-ի Օվկիանոսային և մթնոլորտային հետազոտությունների ազգային վարչության տիեզերական եղանակի կանխատեսման կենտրոնի տվյալները: 

Մագնիսային փոթորիկներն առաջանում են արեգակնային պլազմայի՝ Արեգակի արտանետած լիցքավորված մասնիկների հոսքերի ազեցության ներքո: Մասնիկները, բախվելով մագնիսոլորտին, ստիպում են նրան տատանվել, ինչը կարող է ռադիոխափանումներ առաջացնել: Մագնիսային ցնցումների ինդեքսի սանդղակում Kp 10 մակարդակներ կան, 0-3 ցուցանիշները համապատասխանում են հանգիստ մագնիսոլորտին, 4-րդ մակարդակը՝ անհանգիստ, իսկ 5-9 մակարդակները՝ հինգ դասակարգերի մագնիսային փոթորիկներին, հաղորդում է ՌԻԱ Նովոստին:  

NOAA-ի տվյալներով՝ երեքշաբթի լույս գիշերը՝ ժամը 24:00-ի սահմաններում, Kp ինդեքսն աճել է զրոյից մինչև 4 ցուցանիշ, սակայն արդեն երեք ժամ հետո վերադարձել է «կանաչ գոտի»՝ ընկնելով մինչև 3 մակարդակը:

Միաժամանակ, պլազմայի արտանետումը շաբաթ օրն առաջացրել է այսպիսի իրադարձության համար 10 մեգաէլեկտրոնվոլտից ցածր պրոտոնների անսովոր ուժեղ էներգետիկ հոսք՝ այն աճել է ավելի քան տասն անգամ: Սակայն ներկայումս այդ պարամետրը վերադարձել է նորմայի:

Միևնույն ժամանակ, Երկիր հասած արեգակնային պլազմայի արտանետումը հանգեցրել է բևեռային ուժեղ փայլատակումների, որոնք դիտվել են բևեռային մի շարք շրջաններում, մասնավորապես, Ֆինլանդիայում, հայտնում է Spaceweather.com-ը: --0—