ԵՐԵՎԱՆ, 4 սեպտեմբերի. /Նովոստի–Արմենիա/. Հայաստանը պաշտոնապես չի հայտարարել Վրաստանում Agile Spirit 2017 բազմազգ զորավարժություններին մասնակցելու մտադրության մասին, հայտնեց Հայաստանի պաշտպանության փոխնախարար Արտակ Զաքարյանը։
Մի շարք հայկական լրատվամիջոցներ հաղորդում են տարածել, որ Հայաստանը վերջին պահին հրաժարվել է սեպտեմբերի 3-11–ն անցկացվող ՆԱՏՕ–ի զորավարժություններին մասնակցելուց։
«Չեմ կարող ասել, թե ինչու է Հայաստանը նշված եղել մասնակիցների ցուցակում։ Հայկական զինված ուժերը երբեք չեն հայտարարել, թե մասնակցելու են հերթական զորավարժությանը»,– ասաց Զաքարյանը։
Նա նշեց, որ չգիտի, թե ինչու են վրացական աղբյուրները հայտնում, թե Հայաստանը վերջին պահին հրաժարվել մասնակցությունից։
«Ցանկացած ծրագիր միշտ կարող է վերանայվել»,– ավելացրեց Զաքարյանը։
Նրա խոսքով, Հայաստանի պաշտպանության նախարարության որոշումը պայմանավորված չէ զորավարժություններին Ադրբեջանի մասնակցությամբ։
Загружается новость ...
"Право"
«Ոչ մի խնդիր չի լինի։ ՆԱՏՕ–ն եղել է, կա և կմնա մեր գործընկերը։ Բայց Հայաստանը ՀԱՊԿ լիիրավ անդամ է, որը մեր անվտանգության հիմնական «հովանոցն» է»,– ասաց փոխնախարարը։
Ինչպես փետրվարին հայտնել էր Հայաստանի նախագահ Սերժ Սարգսյանը, Հայաստանը և ՆԱՏՕ–ն հաջողությամբ իրականացրել են IPAP անհատական գործընկերության չորս ծրագրեր և քննարկում են հինգերորդի իրականացումը` 2017-19 թվականներին։
Հայաստանի մասնակցությունն IPAP–ին (Individual Partnership Action Plan - IPAP), որի շուրջ համաձայնագիրը ստորագրվել է 2005 թվականի դեկտեմբերին, ենթադրում է ՆԱՏՕ–ի հետ պարբերական խորհրդատվությունների անցկացում տարածաշրջանային անվտանգության շուրջ, հենց այդ անվտանգության ռազմավարության, Հայաստանի զինվորական դոկտրինայի մշակում, պաշտպանական և բյուջետային գործընթացի ծրագրման կատարելագործում և այլ հարցեր։ -0-
