Հայ-ռուսական հարաբերությունների մակարդակի բարձրացումը կամրապնդի Հարավային Կովկասի անվտանգության ընդհանուր հիմքը և հավասարակշռություն կապահովի տարածաշրջանի բոլոր խաղացողների համար, երկուշաբթի «Նովոստի» միջազգային մամուլի կենտրոնում «Դմիտրի Մեդվեդևի՝ Հայաստան կատարած այցի արդյունքները» Երևան-Մոսկվա տեսակամուրջի ժամանակ ասաց իշխող Հայաստանի Հանրապետական կուսակցություն խորհրդարանական խմբակցության անդամ Հերմինե Նաղդալյանը։
«Ռուս-հայկական հարաբերությունները շատ բարձր մակարդակում են, դրանք բնութագրվում են ռազմավարական գործընկերությամբ։ ՌԴ նախագահ Դմիտրի Մեդվեդևի այցը Հայաստան այսօր մեզ թույլ տվեց ամրապնդել դաշնակցային հարաբերությունները և առավել փաստարկված ասել, որ Ռուսաստանն ու Հայաստանը լուրջ և ծանրակշիռ գործընկերներ են, և մեր փոխհարաբերությունները զարգանում են համազոր գործընկերության մակարդակի վրա»,- ասաց Նաղդալյանը։
2010 թ.-ի օգոստոսի 19-20-ը ՀՀ նախագահ Սերժ Սարգսյանի հրավերով տեղի է ունեցել Ռուսաստանի Դաշնության նախագահ Դմիտրի Մեդվեդևի՝ Հայաստանի Հանրապետություն կատարած պետական այցը:
ՀՀ Ազգային ժողովի և ՌԴ Դաշնային ժողովի միջև համագործակցության միջխորհրդարանական հանձնաժողովի անդամ Հեղինե Նաղդալյանի խոսքով, եթե ռազմաքաղաքական մակարդակում երկրների միջև մինչև այժմ չափազանց լուրջ և լավ համագործակցություն է եղել, ապա այցից հետո տնտեսական բաղկացուցիչը նույնպես լրջորեն առաջ կշարժվի։ «Մարդասիրական բաղկացուցիչը նույնպես բավական մեծ է»,-ավելացրեց նա։
Պատգամավորը նշեց նաև, որ հայ հասարակությունն ու քաղաքական ուժերը այցի արդյունքներից գոհ մնալու հիմքն ունեն:
«Այցը շատ հեռու գնացող արդյունքներ կունենա։ Դրանք գրանցվել են մի քանի փաստաթղթերում»,- ասաց նա։
Այցի ընթացքում միջուկային էներգետիկայի ոլորտում, հետընդունման (ռեադմիսիա), առևտրային ներկայացուցչությունների փոխադարձ հաստատությունների մասին միջկառավարական համաձայնագրեր են ստորագրվել ։
Բացի այդ, Հայաստանի տարածքում ռուսական ռազմակայանի պայմանագրում փոփոխություններ մտցնելու մասին միջպետական արձանագրություն է ստորագրվել, ինչպես նաև՝ արտոնագրված ծառայությունների կենտրոնների և ռազմական տեխնիկայի և տեխնիկական սպասարկման ու վերանորոգման համատեղ ձեռնարկությունների ստեղծման բնագավառում համագործակցության հարցերի մասին փոխըմբռնման հուշագիր:
Նաղդալյանը կարծում է, որ այցը բավական լուրջ ազդեցություն կունենա տարածաշրջանում, մասնավորապես՝ Հայաստանում։ Ըստ պատգամավորի, այս այցի արդյունքները դժվար է գերագնահատել։ -0-
