Հորդառատ տեղումները Սևանա լճի մակարդակի աննախադեպ բարձրացման են հանգեցրել. Հանձնաժողովի նախագահ

Հայաստանում գրանցված հորդառատ տեղումները հանգեցրել են Սևանա լճի մակարդակի աննախադեպ բարձրացման, տարեսկզբից լճի մակարդակը բարձրացել է 78 սանտիմետրով և կազմել 1901,1 մետր, տեղեկացրեց ՀՀ  նախագահին առընթեր Սևանա լճի խնդիրներով զբաղվող հանձնաժողովի նախագահ Վլադիմիր Մովսիսյանը:

«2029 թվականին Սևանա լճի մակարդակը կհասնի օրենքով ամրագրված 1903,5 մետրի: Այս պահին ջրի մակարդակը կազմում է 1901,1 մետր, այսինքն սահմանված կետին հասնելուն մոտ երեք մետր է մնացել», - ասաց Մովսիսյանը երեքշաբթի «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ:

Նա նշեց, որ նախորդ տարվա նույն ժամանակահատվածի համեմատ Սևանա լճի ջրի մակարդակը ավելացել է 67 սմ-ով:

Խոսելով սահմանված 1903,5 մետրի մասին՝ հանձնաժողովի նախագահը նշեց, որ այս ցուցանիշը հիմնավորված է ինչպես տնտեսական, այնպես էլ տեխնիկական տեսակետից:

«Այս մակարդակը թույլ կտա ավելացնել լճի ջրի ծավալը 8 միլիարդ խորանարդ մետրով: Ջրի այս ծալավը կարող է օգտագործվել ամենատարբեր նպատակներով», - ասաց Մովսիսյանն՝ ավելացնելով, որ լճի ջուրը, մասնավորապես, օգտագործվում է ոռոգման նպատակներով:

Այս կապակցությամբ նա նշեց, որ Հայաստանում կա 79 ջրամբար, որոնք ընդհանուր առմամբ տեղավորում են 1 միլիարդ խորանարդ մետր ջուր, իսկ 8 միլիարդ խորանարդ մետր ջուր կուտակելու համար հարկավոր կլիներ կառուցել շուրջ 250 միլիարդ դոլարի 700 լրացուցիչ արհեստական ջրամբարներ, ինչը նպատակահարմար չէ:

Սևանա լիճը Եվրոպայի և Ասիայի ամենաբարձր և մեծ լեռնային լճերից մեկն է, գտնվում է Հայկական բարձրավանդակի սրտում՝ 1914 մ բարձրության վրա։ Երկարությամբ՝ հյուսիս-արևմուտքից դեպի հարավ-արևելք, լիճը ձգվում է ավելի քան 70 կմ, իսկ նրա ջրային հայելու մակերեսը հասնում է գրեթե 1500 քառակուսի մետրի։

Սևանա լիճը  խմելու ջրի միակ խոշոր երաշխավորված աղբյուրն է Հայաստանում և խոշորագույնը ողջ Կովկասում:-0-