ԵՐԵՎԱՆ, 10 մարտի. /Նովոստի-Արմենիա/. Երևանի «Ալմաստ» ավտոկայանից մեկնարկող Երևան-Հրազդան երթուղով նոր էլեկտրագնացքի գործարկման հնարավորությունը աշխատանքային հանդիպման ընթացքում քննարկեցին «ՀԿԵ» ՓԲԸ գլխավոր տնօրեն Շևքեթ Շայդուլլինը և «Քանաքեռ-Զեյթուն» համայնքի թաղապետ Արայիկ Քոթանջյանը, տեղեկացնում է ՀԿԵ մամուլի ծառայությունը։
ՀԿԵ ղեկավարությունից և թաղապետարանի ներկայացուցիչներից բացի հանդիպմանը ներկա էր քաղաքի գլխավոր ճարտարապետ նաև Սերգեյ Դանիելյանը։ Կողմերը տեղում ուսումնասիրեցին Երևան-Հրազդան ճանապարհահատվածի վիճակը։
Հանդիպմանը քննարկվեց նաև երկաթուղային տրանսպորտի շաղկապումն ավտոմոբիլայինի հետ։ ՀԿԵ ներկայացուցիչների կարծիքով, միջքաղաքային նոր երթուղու գործարկումը թույլ կտա նվազեցնել տրանսպորտային ենթակառուցվածքի բեռնվածությունը, ինչպես նաև ստեղծել ավտոմոբիլային ուղևորափոխադրման ոչ թանկ այլընտրանք։ Ճանապարհի ենթադրվող տևողությունը 50 րոպե է, ինչը նույնպես կնպաստի, որպեսզի ուղևորներն ընտրեն այս տարբերակը։
Ավելի վաղ Երևանի քաղաքապետ Գագիկ Բեգլարյանը հավանություն է տվել երևանյան կայարանում երկաթուղային տրանսպորտն ավտոմոբիլայինի հետ շաղկապող տրանսպորտային հանգույցների ստեղծման ՀԿԵ նախաձեռնությանը։
Հանդիպումն անցավ կառուցողական և աշխատանքային մթնոլորտում, ինչը վկայում է «ՀԿԵ» ՓԲԸ-ի և Երևանի քաղաքապետարանի համագործակցության բարձր աստիճանի մասին։
«Հայկական երկաթուղիների» կոնցեսիոն կառավարումն իրականացնում է «ՀԿԵ» ՓԲԸ-ն՝ «Ռուսական երկաթուղիներ» ԲԲԸ-ի հարյուրտոկոսանոց դուստրը: ՀԿԵ-ն իր բալանսում ընդունել ՀԵ շարժակազմը 2008թ. հունիսի մեկից՝ «Հայկական երկաթուղիներ» պետական ՓԲԸ-ն 30 տարի ժամկետով փոխանցման, կողմերի փոխադարձ համաձայնությամբ ևս 10 տարի երկարացման իրավունքով՝ 2008թ. փետրվարի 13-ի կոնցեսիոն պայմանագրին համապատասխան։--0—
