Հայաստանի կառավարության ղեկավարը հանդիպել է «ԱլկաՏել-Լյուսենտ» ընկերության ղեկավարության հետ
ՀՀ վարչապետ Սերժ Սարգսյանը հինգաշբթի հանդիպել է տեղեկատվական տեխնոլոգիաների ոլորտում աշխարհի առաջատար ընկերություններից մեկի` ֆրանսիական «ԱլկաՏել-Լյուսենտ» ընկերության նախագահ Սերժ Չուրուքի և «Նայթսբրիջ» հոլդինգի նախագահ, ՀՀ նախկին վարչապետ Արմեն Սարգսյանի հետ:
«Հանդիպման ընթացքում կողմերը քննարկել են Հայաստանում փոխշահավետ գործունեություն ծավալելու` «ԱլկաՏել-Լյուսենտ» ընկերության մտադրությունների և նաև տարածաշրջանային առումով հետաքրքրություն ներկայացնող հեռանկարային ծրագրերի մասին»,-«Նովոստի-Արմենիային» հայտնեցին հառավարության տեղեկատվության և հասարակայնության հետ կապերի վարչությունից:
Վարչապետը ողջունել է այդ մտադրությունները՝ ընդգծելով, որ Հայաստանի համար մրցակցային առավելությունը համայն հայության միացյալ ներուժն է։
«Մենք կարող ենք զարգացնել մեր տնտեսությունն ու մեր երկիրը` առաջին հերթին լիարժեքորեն օգտագործելով մեր ժողովրդի ներուժը, օգտվելով տարիների մեծ փորձ և հեղինակություն ունեցող «ԱլկաՏելի» նման ընկերությունների հնարավորություններից ու առաջարկներից»,-հանդիպման ժամանակ ասել է վարչապետը:
«ԱլկաՏել-Լյուսենտ» ընկերության նախագահ Սերժ Չուրուքը նշել է, որ վերջին տարիներին Հայաստանը տնտեսական նշանակալի աճ է արձանագրել, ինչը ակներև է նաև օտարերկրյա այցելուների համար։
«Աշխարհում բարձր տեխնոլոգիաները գնալով երկրների համախառն ներքին արդյունքում մեծացնում են իրենց տեսակարար կշիռը: Հայաստանը ներկայումս մեծ հնարավորություններ ունի հաջողություններ գրանցելու այդ ոլորտում, և անհրաժեշտ է առավելագույնս օգտվել առկա հնարավորություններից»,- ՀՀ վարչապետի հետ հանդիպմանը նշել է Սերժ Չուրուկը։
Զրուցակիցները, առաջավոր տեխնոլոգիաներից բացի, մեր երկրի համար հեռանկարային են համարել նաև ֆինանսական շուկայի զարգացումը:--0--
