Հայաստանը շահագրգիռ է ավստրիական կապիտալի ներգրավմամբ. դեսպան

ԵՐԵՎԱՆ, 2 հոկտեմբերի./Նովոստի-Արմենիա/. Հայաստանը փորձում է երկիր գրավել ավստրիական կապիտալը։ Այս մասին երեքշաբթի մամուլի ասուլիսի ժամանակ հայտարարեց Ավստրիայում. Հունգարիայում, Չեխիայում և Սլովակիայում (նստավայրը՝ Վիեննա) Հայաստանի արտակարգ և լիազոր դեսպան Աշոտ Հովակիմյանը։

Նրա գնահատականով, համագործակցության մեծ հեռանկարներ կան  բանկային ոլորտում, քանի որ ավստրիական մի քանի խոշոր բանկեր  արդեն գործում են ԱՊՀ տարածքում։

Դեսպանը նշեց, որ Կենտրոնական և Արևելյան Եվրոպայի խոշորագույն բանկերից մեկի՝ «Ռայֆայզեն բանկի» ծրագրում հիշատակվում է Հայաստանը։

«Հայաստանում այդ բանկի մասնաճյուղի բացումը շատ կարևոր իրադարձություն կլինի երկրի բանկային համակարգի համար»,- ասաց նա։ Հովակիմյանի խոսքերով, ներդրումների ներգրավման հաջորդ ոլորտը զբոսաշրջությունն է, որտեղ հնարավոր է օգտագործել ավստրիական փորձը և ներգրավել նրանց մասնագետներին։

«Ավստրիան տուրիստական երկիր է, մասնավորապես, այնտեղ շատ զարգացած է ձմեռային զբոսաշրջությունը, և այս ոլորտում ավստրիական կողմը կարող է մեզ աջակցել և ներդրումներ կատարել»,- նշեց դիվանագետը։

Միաժամանակ նա տեղեկացրեց, որ տարեցտարի ավելանում է Հայաստան այցելող ավստրիացի զբոսաշրջիկների թիվը։

 «Միայն այս տարի, իմ տվյալներով, Հայաստան է այցելել 15 տուրիստական խումբ»,- հայտնեց նա՝ նշելով, որ Հայաստանը զբոսաշրջիկներին հետաքրքրում է որպես առաջին քրիստոնեական երկիր։ --0—