«Պատասխանատվություն եմ կրում նրա գործողությունների համար». Փաշինյանը պարզաբանել է՝ ինչու է Ռուբինյանին նշանակել Թուրքիայի հետ բանակցությունների հատուկ ներկայացուցիչ

ԵՐԵՎԱՆ, 19 հունվարի./Նովոստի-Արմենիա/. ՀՀ վարչապետ Նիկոլ Փաշինյանը հայտարարել է, որ Ռուբեն Ռուբինյանին Թուրքիայի հետ կարգավորման գործընթացի հարցով Հայաստանի հատուկ ներկայացուցիչ նշանակելու որոշումն անձամբ է կայացրել՝ քաղաքական նպատակահարմարությունից ելնելով:


«Ռուբեն Ռուբինյանին այդ կարգավիճակով օժտելու որոշումը ես եմ կայացրել, կայացրել եմ քաղաքական նպատակահարմարությունից ելնելով: Ռուբեն Ռուբինյանը հաշվետու է ինձ, Անվտանգության խորհրդին, նաև մեծ հաշվով` ժողովրդին», - ասաց նա՝ պատասխանելով պատգամավորների հարցերին:

Նա նշեց, որ անկախ նրանից, թե ով կլինի բանակցողի կարգավիճակում, պրոցեսի ամբողջ պատասխանատվությունը կրում է ինքը:

«Ես Ռուբինյանին օժտել եմ նաև այդ լիազորություններով՝ հաշվի առնելով անհրաժեշտությունը, որ ես այնտեղ նրա գործողությունների ամբողջ պատասխանատվությունը պետք է կրեմ: Եվ ես այդպես վարվել եմ, որ հանկարծ, ենթադրենք, թաքնված, գաղտնի կուսակցականի այդ կարգավիճակով չօժտեմ, որ պետությանը զեկուցելու փոխարեն գա և զեկուցի այլ երկրների ազդեցության գործակալներին: Ես եմ կրում պատասխանատվություն, լիազորել եմ և կրում եմ պատասխանատվությունը և կրելու եմ պատասխանատվությունը», - ասաց նա:

Նշենք, որ հունվարի 17-ին ԱԺ նիստի ժամանակ Ռուբինյանին մեղադրել են, որ նա «Թուրքիայի ազդեցության գործակալ է»:-0-