Ինչպե՞ս պաշտպանել երեխային օտար մարմիններ կուլ տալուց. ԱՆ-ն հիշեցնում է անվտանգության կանոնները

ԵՐԵՎԱՆ, 10 հուլիսի․/Նովոստի-Արմենիա/․ Մինչև 5 տարեկան երեխաները հաճախ աշխարհը ճանաչում են առարկաները բերանը տանելով, ինչը կարող է լուրջ վտանգ ներկայացնել նրանց առողջության և կյանքի համար:

Առողջապահության նախարարությունը հիշեցնում է, որ նման դեպքերի մեծ մասը հնարավոր է կանխել ճիշտ հսկողության և անվտանգության կանոնների պահպանման միջոցով։

Կանխարգելման հիմնական կանոնները

Երեխայի համար անվտանգ միջավայր ապահովելու նպատակով անհրաժեշտ է հետևել մի քանի կարևոր կանոնների.

-Մանր առարկաները, մետաղադրամներն ու կենցաղային մարտկոցները պահել երեխաների համար բացարձակ անհասանելի և փակ վայրում:

-Գնել միայն երեխայի տարիքին և զարգացմանը համապատասխան անվտանգ խաղալիքներ, որոնք չեն մասնահատվում:

-Խուսափել տանը մագնիսներ կամ ջրային գնդիկներ ունենալուց:

-Ցանկալի չէ գնել կոճակ-մարտկոցներով աշխատող խաղալիքներ: Եթե տանն արդեն կան այդպիսիք, ապահովել, որ մարտկոցի հատվածը լինի ամուր փակված և անհասանելի երեխայի համար:

Ահազանգող ախտանիշները

Նույնիսկ եթե ծնողները չեն տեսել, թե ինչ է կուլ տվել երեխան, սակայն նրա մոտ առկա են հետևյալ ախտանիշները, անհրաժեշտ է անհապաղ դիմել մասնագետի.

-առատ թքարտադրություն,

-կուլ տալու դժվարություն կամ հրաժարում սննդից/ջրից,

-հանկարծակի առաջացած հազ, անդադար հազ կամ շնչառության խնդիրներ,

-ցավ կրծքավանդակում, պարանոցում կամ որովայնում,

-շարունակական փսխում կամ արյուն` փսխման զանգվածի կամ կղանքի մեջ:

ԿԱՐԵՎՈՐ Է

Եթե կասկածում եք, որ երեխան ինչ-որ բան է կուլ տվել կամ շնչել, երբեք մի՛ փորձեք ինքնուրույն՝ մատներով կամ այլ իրերով հեռացնել առարկան: Դրանով դուք կարող եք այն ավելի խորը հրել և փակել շնչուղիները:

Մասնագետները հիշեցնում են, որ մեծահասակների պարտականությունն է երեխայի անվտանգ միջավայրի ապահովումը: Անհրաժեշտության դեպքում պետք է անհապաղ զանգահարել շտապօգնություն: