Ադրբեջանը խստորեն խախտել է Ժնևի կոնվենցիայի դրույթները․ ռազմական փորձագետ (ՎԻԴԵՈ)

ԵՐԵՎԱՆ, 1 սեպտեմբերի․ /Նովոստի-Արմենիա/․ Ադրբեջանը խախտել է Ժնևի կոնվենցիայի մի շարք դրույթներ և միջազգային պարտավորություններ հայ զինծառայող Գուրգեն Ալավերդյանի նկատմամբ, այս մասին «Նովոստի-Արմենիա» գործակալության YouTube-յան ալիքի «Հատուկ կարծիք» հաղորդման ժամանակ ասաց ռազմական փորձագետ Կարեն Հովհաննիսյանը:

«Ոտնահարվել է գերու արժանապատվությունը, խոսքի ազատության իրավունքը, և, ընդհրապես, ազգային պատկանելության նկատմամբ ոտնձգություն է տեղի ունեցել», - ասաց Հովհաննիսյանը:

Ընդ որում, փորձագետը նշեց, որ առաջին անգամ չէ, որ պատահում է, որ Ադրբեջանում գերի գտնվող հային չեն կարողանում այցելել միջազգային կազմակերպությունների, մասնավորապես` Կարմիր խաչի միջազգային կոմիտեի ներկայացուցիչները:

«Ընդհանրապես, մեր ռազմագերիները նմանատիպ վերաբերմունքի են «արժանանում»: Եղել են դեպքեր, որ նույնիսկ մեկ-երկու տարի հետո են նրանց այցելել Կարմիր խաչից: Բայց այստեղ ես պետք է ոչ թե կենտրոնանամ Կարմիր խաչի վրա, այլ Ադրբեջանի այսպես կոչված «Մարդու իրավունքների պաշտպանի» գործունեության վրա: Նա ևս չի այցելել ռազմագերին, ինչը ևս խոսում է այն մասին, որ այնտեղ մարդու իրավունքները, որպես այդպիսին, գոյություն չունեն, և որ Ադրբեջանում չկա ռազմական էթիկա »,- ասաց Հովհաննիսյանը:

Ավելի վաղ ՀՀ Պաշտպանության նախարարությունը հայտնել էր, որ օգոստոսի 22-ին ժամը 19:30-ի սահմաններում մարտական հենակետը ստուգելու նպատակով սպա Գուրգեն Ալավերդյանը եղանակային խիստ անբարենպաստ պայմանների պատճառով շփոթվել և մոլորվել է: Ադրբեջանի ՊՆ մոլորվածին ներկայացնում է որպես դիվերասանտ, ինչը չի համապատասխանում իրականությանը։

Ավելի ուշ ՀՀ պաշտպանության նախարար Դավիթ Տոնոյանը հայտարարել է, որ Պաշտպանության  նախարարությունում ծառայողական քննություն է իրականացվում` պարզելու համար սպա Գուրգեն Ալավերդյանի գերեվարվելու հանգամանքները։-0-