Ընտանեկան դրամա՝ բոլորի աչքի առաջ․ Փարիզում կինը խանութից հագուստ է վերցրել, ամուսինը՝ վերադարձրել (ՎԻԴԵՈ)
ԵՐԵՎԱՆ, 19 հոկտեմբերի․ /Նովոստի–Արմենիա/․ Ֆրանսիայում զանգվածային անկարգությունների ֆոնին, որոնց ընթացքում թալանվել են բազմաթիվ խանութներ, Փարիզից արտասովոր միջադեպի տեսանյութ է տարածվել։
Սոցիալական ցանցերում տարածված կադրերում երևում է, թե ինչպես է կինը խանութից հագուստներ վերցնում, իսկ ամուսինը դրանք հետ է վերադարձնում։
Միջադեպը տեղի է ունեցել Ֆրանսիայում բողոքի զանգվածային ցույցերի և անկարգությունների ֆոնին։
Հոկտեմբերի 17-ին Փարիզում, Մարսելում, Լիոնում և Ֆրանսիայի այլ քաղաքներում հարյուր հազարավոր մարդիկ դուրս են եկել փողոց։ Ֆրանսիայի ՆԳՆ տվյալներով՝ ցույցերին մասնակցել է շուրջ 550 հազար մարդ, իսկ կազմակերպիչների գնահատմամբ՝ 800 հազար։
Ինչպես հաղորդել է Reuters-ը, հիմնականում խաղաղ ցույցերը որոշ քաղաքներում վերածվել են ոստիկանության հետ բախումների, ուղեկցվել ավտոմեքենաների հրկիզումներով, խանութների թալանով և պետական շենքերի վնասմամբ։
Հոկտեմբերի 18-ի տվյալներով՝ անկարգությունների ընթացքում ձերբակալվել է ավելի քան 2 հազար մարդ, տուժել է ոստիկանության ավելի քան 600 աշխատակից։
Բողոքի շարժումը սկսվել է սեպտեմբերին՝ կրթական համակարգի խնդիրների պատճառով, իսկ հետագայում դրան միացել են արհմիություններն ու բնակչության այլ խմբեր՝ դժգոհելով կյանքի թանկացումից, սոցիալական անհավասարությունից և պետական ծախսերի կրճատումից։
Կարդացեք նաև․ Սկանդալային կադրեր՝ Երևանի ավտոբուսում․ տղամարդը վիրավորում է հատակին նստած կնոջը, միջադեպով զբաղվում են իրավապահները (ՎԻԴԵՈ)
