Սարսափելի վրաերթ Երևանում. անհայտ մեքենան վրաերթի է ենթարկել հոր և որդու, հայրը տեղում մահացել է, որդու վիճակը ծայրահեղ ծանր է

ԵՐԵՎԱՆ, 9 մարտի./Նովոստի–Արմենիա/. Նախօրեին՝ մարտի 8-ին,  մահվան ելքով վրաերթ է տեղի ունեցել Երևանում:

Shamshyan.com–ի հաղորդմամբ, ժամը 21:40-ի սահմաններում անհայտ մակնիշի և համարանիշի ավտոմեքենայի վարորդը Գևորգ Չաուշի փողոցում վրաերթի է ենթարկել 2 հետիոտնի և, նրանց թողնելով անօգնական, դիմել է փախուստի:

Վրաերթի ենթարկվածներից մեկը տեղում մահացել է, մյուսը ծայրահեղ ծանր ախտորոշմամբ տեղափոխվել է  «Արմենիա» բժշկական կենտրոն:

Ոստիկանները պարզել են,  որ վիրավորը Երևանի բնակիչ, 34-ամյա Էդգար Մայիլյանն է, իսկ մահացածը՝ նրա հայրն է՝ Սամվել Մայիլյանը, ում տարիքը ճշտվում է:

Փաստի առթիվ Ա. Ադամյանի որոշմամբ հարուցվել է քրեական գործ ՀՀ ՔՕ 242–րդ հոդվածի 2-րդ մասի (ճանապարհատրանսպորտային պատահար, որն անզգուշությամբ առաջացրել է մարդու մահ) և 244 հոդվածի  (դեպքի վայրից փախուստի դիմելը)  հատկանիշներով:

Ոստիկանությունն ու քննչական բաժինը ձեռնարկում են անհրաժեշտ օպերատիվ-հետախուզական և քննչական համատեղ գործողություններ՝ փախուստի դիմած վարորդին հայտնաբերելու  ուղղությամբ:

Կայքի հաղորդմամբ, վրաերթի ենթարկվածները  հայր ու որդի են, ովքեր փողոցն անցել են հետիոտնի  համար նախատեսված վայրով:–0–