Երկրաշարժի հետքերով. Գյումրիում մարդիկ դուրս են եկել տներից, ավերածություններ չկան

ԵՐԵՎԱՆ, 10 սեպտեմբերի./Նովոստի–Արմենիա/. Քիչ առաջ Հայաստան–Վրաստան սահմանային գոտում 6–7 բալ ուժգնությամբ երկրաշարժ է գրանցվել։

Ինչպես հաղորդում է «Նովոստի–Արմենիա» գործակալության թղթակիցը Գյումրիից, քաղաքում խուճապ ու ավերածություններ չկան։

«Անջատվել է կենտրոնական փողոցներից մեկի մի հատվածի էլեկտրականությունը։ Մարդիկ հանգիստ դուրս են եկել տներից, սակայն նրանց մեծ մասն արդեն վերադարձել է տուն», – նշում է թղթակիցը։

ՀՀ ԱԻՆ Փրկարար ծառայության հաղորդմամբ, սեպտեմբերի 10-ին, տեղական ժամանակով ժամը 20:22-ին (Գրինվիչի ժամանակով ժամը 16:22-ին) ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 41.08⁰ և արևելյան երկայնության 43.94⁰ աշխարհագրական կոորդինատներով (Հայաստան-Վրաստան սահմանային գոտի՝ Բավրա գյուղից 13 կմ հյուսիս-արևելք), օջախի 10 կմ խորությամբ, 4.8 մագնիտուդով երկրաշարժ:

Էպիկենտրոնային գոտում ստորգետնյա ցնցման ուժգնությունը կազմել է 6-7 բալ:

Նախնական տվյալներով երկրաշարժը զգացվել է ՀՀ Շիրակի, Լոռու, Տավուշի, Արագածոտնի, Արմավիրի մարզերում և Երևան քաղաքում:–0–