Լինգը թողել ու փախել էր․ չհաջողված գողություն խանութից (ՎԻԴԵՈ)

ԵՐԵՎԱՆ, 22 փետրվարի․/Նովոստի–Արմենիա/․ Փետրվարի 18-ի առավոտյան ժամը 5-ին ոստիկանության Տավուշի բաժնում հաղորդում է տվել Բերդ քաղաքի մի բնակիչ: Նա հայտնել է, որ գիշերվա ժամը 2-3-ի կողմերը ձայներ են լսել Մաշտոցի փողոցում գտնվող խանութի կողմից, մոտեցել են և ճաղավանդակի արանքում նկատել լինգ: Ընդ որում, ոչ մի բանի ձեռք չէին տվել, իրենց ուժերով պահպանել էին դեպքի վայրը` մինչ իրավապահները կհասնեին, հաղորդում է ՀՀ ոստիկանությունը:

Դեպքի վայր մեկնեց բաժնի օպերատիվ խումբը: Ակնհայտ էր, որ փորձել էին հանել ճաղավադակն ու գողություն անել խանութից:


Բերդի քննչական բաժնում նախաձեռնվեց քրեական վարույթ, իրականացվեցին անհետաձգելի գործողություններ: Քրեական հետախույզներն էլ, զուգահեռ իրացնելով օպերատիվ-հետախուզական տվյալները, նույն օրը ցերեկը, ժամը 13.30-ին, իր տան մոտ հայտնաբերեցին Բերդ քաղաքի Աբովյան փողոցի բնակիչ 32-ամյա երիտասարդին, հրավիրեցին բաժին, որտեղ նա խոստովանեց, որ գողության փորձ կատարողը ինքն է:

Ըստ նախնական տեղեկության` հանցագործությունն ավարտին հասցնելուն նրան խանգարել էր պատահական մի մեքենա: Մթության մեջ նկատելով մոտեցող լուսարձակները` 32-ամյա երիտասարդը ենթադրել էր, թե կարող են ոստիկաններ լինել, ամեն ինչ թողել էր տեղում և շտապ հեռացել:

Տղամարդը ներկայացվել է նախաքննական մարմին: Դեպքի հանգամանքները նախաքննությամբ պարզվում են:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:–0–