ԵՐԵՎԱՆ, 21 փետրվարի./Նովոստի–Արմենիա/. Սոցցանցերի օգտատերերը հրապարակել են երկնքում հայտնված կապույտ բռնկման լուսանկարներ և տեսանյութեր։ Այդ բռնկումը նկատվել է երկուշաբթի երեկոյան թուրք-սիրիական սահմանին տեղի ունեցած երկրաշարժից առաջ, հայտնում է
ՌԻԱ Նովոստին։
Տեսանյութում երևում է կապույտ փայլ, որին հաջորդում են ցնցումներ։ Նշվում է, որ այս երևույթը նկատել են սիրիական Լաթաքիայի և Թուրքիայի սահմանամերձ շրջանների բնակիչները։
Դամասկոսի համալսարանին կից գործող Սեյսմոլոգիական ուսումնասիրությունների բարձրագույն ինստիտուտի տնօրեն Հալա Հասանը հայտնել է, որ այդ երկնագույն լուսավորությունը չունի բացատրություն, բայց նաև նշել է, որ ստորգետնյա ցնցումներից առաջ փոխվում են մթնոլորտի էլեկտրական և մագնիսական դաշտերը։
Թուրքիայի բնական աղետների հետևանքների վերացման վարչությունը (AFAD) երկուշաբթի հայտնել է, որ Հաթայ նահանգում երեք րոպե տարբերությամբ գրանցվել է երկու երկրաշարժ` 6,4 և 5,8 մագնիտուդով, որոնց հաջորդել են տասնյակ հետցնցումներ։ Վերջին տվյալներով, երեք մարդ մահացել է, 213 մարդ վիրավոր է։ Երկրաշարժը զգացել են Սիրիայի մի շարք նահանգների բնակիչներ։
Դամասկոսի և Բեյրութի բնակիչների խոսքով, ստորգետնյա ցնցումները զգացվել են այնքան ուժեղ, ինչպես փետրվարի 6–ի ավերիչ երկրաշարժի ժամանակ էր։
Տեսանյութը կարող եք դիտել
հետևյալ հղումով։–0–
