ԵՐԵՎԱՆ, 10 ապրիլի./Նովոստի–Արմենիա/. Ղազախստանում ՀՀ պատվավոր հյուպատոսի գրասենյակը Ակտոբեի մարզում ՀՀ պատվավոր հյուպատոս Հայկ Տերտերյանի նկատմամբ սահմանված տնային կալանքի առնչությամբ հայտնում է, որ դատական գործի քննությունը, որը վերաբերում է պատվավոր հյուպատոսի անձնական տնտեսական գործունեությանը, գտնվում է ընթացքի մեջ։
Ինչպես հայտնեցին «Նովոստի–Արմենիա» գործակալությանը հյուպատոսի գրասենյակից, գործին վերաբերող պարզաբանումները կտրվեն դատական գործընթացի ավարտից հետո։
Ինչպես ավելի վաղ հայտնել է zakon.kz–ն, ձեռներեցի նկատմամբ, ով հայտնվել է խոզաբուծական ֆերմայի հետ կապված սկանդալի կենտրոնում, կիրառվել է տնային կալանք։ Նրան մեղադրում են բնապահպանական օրենսդրության կոպիտ խախտման մեջ։ Այժմ նրան սպառնում է 3–7 տարվա ազատազրկում։
«Փարիզյան համայնք» ընկերության ("Парижская коммуна") միակ հիմնադիրն ու տնօրենը 1950թ.–ին ծնված Հայկ Տերտերյանն է։ Հիմա նա գործով անցնում է որպես կասկածյալ։ Նրա նկատմամբ որպես խափանման միջոց է ընտրվել տնային կալանքը։
Բեստամակ գյուղի բնակիչներն արդեն մի քանի տարի է` խնդրում են փակել խոզաբուծական ֆերման անտանելի հոտի պատճառով։ Մարդին պնդում էին, որ ձեռնարկությունը թունավորում է գետերը, հողը` սպառնալիքի տակ դնելով ավելի քան երեք հազար գյուղացու կյանք։ Նրանց խոսքով, ամեն օր ֆերման դեն էր նետում խոզի 300 գլուխ։
Ֆերման ենթարկվել է ոչ պլանային ստուգման։ Այդ ժամանակ էլ պարզվել է, որ խոզաբուծարանի արտադրական և կենսաբանական բոլոր թափոնները, կենցաղային և շինարարական աղբը պարզապես լցնում էին գյուղի մոտակայքում գտնվող խրամատն ու թաղում, որի մակերեսը կազմել է մոտ 6 հեկտար։
Ստուգողները փորել ու հանել են գրեթե 200 տոննա թափոն, դա էլ դեռ ամբողջ թափոնների մի մասն է։
Բացի այդ պարզվել է, որ ձեռնարկությունը երկու տարի աշխատել է առանց բնապահպանական թույլտվության։ Ընդ որում խոզաբուծարանում նշված 40 հազար խոզի փոխարեն պահվել է ավելի քան 50 հազար։ Բոլոր խախտումների ընդհանուր վնասը կազմել է 7 մլրդ։ Արդյունքում գործը հասել է դատարան։–0–
