Թրամփը Իրանին կներկայացնի միջուկային գործարքի հետ կապված «վերջին առաջարկը»
ԵՐԵՎԱՆ, 17 հունիսի․/Նովոստի–Արմենիա/․ ԱՄՆ նախագահ Դոնալդ Թրամփը Իրանին կներկայացնի միջուկային գործարքի հետ կապված «վերջին առաջարկը», գրում է РБК-ն՝ հղում անելով The Jerusalem Post-ի ամերիկյան և եվրոպական աղբյուրներին։
Հրատարակությունը նշում է, որ այս առաջարկը կարող է «նույնիսկ շատ ավելի լավ» լինել, քան մոտ մեկուկես շաբաթ առաջ Վաշինգտոնի կողմից Թեհրանին արվածը։ Այս դեպքում պայմանը կլինի ԱՄՆ-ի կողմից նախկինում հնչեցված պահանջը՝ Իրանը պետք է ամբողջությամբ հրաժարվի ուրանի հարստացումից։
Թերթը հայտնում է, որ Իրանը դիմել է Օմանին և Կատարին միջնորդել Թրամփի վարչակազմի հետ բանակցություններում՝ Իսրայելի հարձակումները դադարեցնելու համար։ Հրատարակությունը նշում է, որ Սաուդյան Արաբիան նույնպես առանձին խողովակով աշխատում է հրադադարի հարցի շուրջ։
Ինքը՝ Թրամփը, հաստատեց, որ Իրանը խնդրել է ԱՄՆ-ին դադարեցնել Իսրայելի հարվածները և ասել է. «Կարծես թե Իրանը չի հաղթում այս պատերազմում։ Նրանք պետք է խոսեն, քանի դեռ շատ ուշ չէ»։
Հունիսի 13-ի գիշերը Իսրայելը հարձակվել է Իրանի ռազմական և միջուկային օբյեկտների վրա, ինչպես նաև իրականացրել հատուկ գործողություններ՝ երկրի բարձրագույն ռազմական ղեկավարության ներկայացուցիչներին և միջուկային ֆիզիկոսներին վերացնելու համար։ Հունիսի 15-ի գիշերը Իրանը պատասխանել է՝ Իսրայելին հարվածելով բալիստիկ հրթիռներով և անօդաչու թռչող սարքերով։ Փոխադարձ հարձակումները շարունակվում են, կան տեղեկություններ քաղաքացիական և ռազմական օբյեկտներին հասցված վնասի, ինչպես նաև բազմաթիվ զոհերի և վիրավորների մասին։
