ԵՐԵՎԱՆ, 11 օգոստոսի. /Նովոստի-Արմենիա/. Մնջախաղի բազմաթիվ սիրահարները, Ծաղկաձորի բնակիչները և հյուրերը չորեքշաբթի երեկոյան ականատես եղան զարմանահրաշ շոուի բաց երկնքի տակ։
Լեոնիդ Ենգիբարյանի անվան մնջախաղի միջազգային 5-րդ փառատոնի բացման շրջանակում բաց երկնքի տակ պատրաստված բեմի վրա ժանրի սիրահարներին իրենց վարպետությունն են ցույց տվել հայ և օտարերկրյացի դերասան-միմոսները:
Փառատոնի մասնակիցների թվում են` «Ժիվոսվետ» մնջախաղի մանկապատանեկան թատրոնը և Սանկտ Պետերբուրգի Հեքիաթի պետական տիկնիկային թատրոնը, դերասան Ջոն Ջեյքոբսը ՀԱՀ-ից, Մնջախաղի արվեստի լաբորատորիան Ուկրաինայից, «Աուրա» թատերախումբն Իրանից, Վրաստանի մնջախաղի պետական թատրոնը, Աֆրիկյան պարերի հիմնադրամը Գանայից, դերասան Վահրամ Զարյանը Ֆրանսիայից:
Հայաստանի դպրոցն այս ժանրում ներկայացնում են «Անվերջ թատերական կղզի» մնջախաղի և պոեզիայի թատրոնը, ԵԹԿՊԻ –ի շրջանավարտները, Հայաստանի մնջախաղի պետական թատրոնը, «Kalashyan Dancing» պարային համույթը և «Մենք» Խուլերի մնջախաղի թատրոն-ստուդիան:
Կյանքն ինչպես կա` միմիկայի և մարմնի շարժումների միջով
Մնջախաղի միջազգային փառատոնի մասնակիցները բազմաժանր ներկայացումներ են պատրաստել, բայց բոլորն էլ ներկայացնում են կյանքը, ինչպիսին որ կա:
«Նովոստի-Արմենիա» գործակալության հետ զրույցում հարավաֆրիկյան դերասան Ջոն Ջեյքոբսը պատմել է Հայաստան այցի իր տպավորությունների և իր ելույթի մասին:
«Իմ ներկայացումը պատմում է կյանքի և մարդկանց մասին, այն բաղկացած է մի քանի փոքր մասերից` պատմող իմ մահացած ուսուցիչների, Մարսել Մարսոյի, դստերս, Պարկինսոնի հիվանդությունից տառապող մարդկանց մասին: Սա շատ հուզիչ պատմություն է, որը վերաբերում է աշխարի բոլոր մարդկանց», - նշել է Ջեյքոբսը:
Ծանոթանալով հայկական մշակույթին` Ջեյքոբսը որոշել է օգտագործել Ֆլորա Մարտիրոսյանի երգերն իր ներկայացման մեջ` որպես նվագակցություն։ Նա ավելացրել է, որ ապագայում անպայման մտադիր է վերադառնալ Հայաստան:
«Վեցերորդ զգայարանը»
Մնջախաղի պետական թատրոնին և Արարատյան հայրապետական թեմին կից գործող «Մենք» խուլերի մնջախաղի թատրոն-ստուդիայի ղեկավար Զուբեյդա Մելիքյանը նշեց, որ խումբը ստեղծվել է 2012 թ.-ին, սակայն մնջախաղով պրոֆեսիոնալ սկսել են զբաղվել երկու տարի առաջ:
«Խումբը բաղկացած է 15 մարդուց: Մասնակցությունն այս փառատոնին յուրահատուկ ցատկահարթակ դարձավ խմբի համար, ինչի շնորհիվ մենք իրականացրինք մեր գլխավոր երազանքը և մեր ուժերով կարողացանք ներկայացնել մեզ հանդիսատեսին: Մեր դերասանները շատ են սիրում արվեստի այս տեսակը և սիրով են դրանով զբաղվում», - ավելացրեց Մելիքյանը:
Բազմազգ իրարանցում
Երևանի մնջախաղի պետական թատրոնի գեղարվեստական ղեկավար և փառատոնի պրոդյուսեր Ժիրայր Դադասյանի խոսքով, այս տարվա փառատոնն աչքի է ընկնում մասնակիցների աննախադեպ թվով և բազմաժանր ելույթներով:
Բացի դասական մնջախաղից, փառատոնի շրջանակում նախատեսված են նաև պարային և ակրոբատիկ ներկայացումներ, օտարերկրացի դերասանների մասնակցությամբ վարպետության դասեր, ինչպես նաև միջազգային կոնֆերանս` Մնջախաղի միջազգային ասոցիացիայի նախագահ Մարկո Ստոհանովիչի մասնակցությամբ:
Լեոնիդ Ենգիբարյանի անվան մնջախաղի միջազգային 5–րդ փառատոնն անցկացվում է օգոստոսի 10-15-ը Ծաղկաձորում Մշակույթի նախարարության օժանդակությամբ։ Այս տարի առաջին անգամ փառատոնի շրջանակում ելույթներ կներկայացվեն նաև Դիլիջանում։
«Նովոստի–Արմենիա» գործակալությունը փառատոնի աջակիցն է։ -0-
