Մըրայա Քերին ելույթ կունենա Երևանում

ԵՐԵՎԱՆ, 14 դեկտեմբերի. /Նովոստի–Արմենիա/. Ամերիկացի երգչուհի, երգերի հեղինակ, երաժշտական պրոդյուսեր, դերասանուհի և բարեգործ Մըրայա Քերին հաջորդ տարի համերգ կտա Երևանում, «Նովոստի–Արմենիա» գործակալությանը հայտնեց Forpostart Production և Show Star ընկերությունների գլխավոր տնօրեն Զառա Մխեյանը։

«Այս պահին երգչուհու հետ բանակցություններ են տարվում։ Երևանյան համերգը ծրագրվում է անցկացնել նրա համաշխարհային շրջագայության շրջանակում։ Ելույթի ամսաթիվն առայժմ հայտնի չէ»,– ասաց Մխեյանը։

Քերին երաժշտության պատմության «ամենավաճառվող» երգչուհիներից է։ Նրա վաճառված սկավառակների ընդհանուր թիվը կազմում է ավելի քան 200 մլն կրկնօրինակ։

2008 թվականին «Touch My Body» երգը գլխավորել է Billboard Hot 100 հիթ շքերթը, ինչը Քերիին դարձրել է միակ կատարող, ում երգերը 18 անգամ զբաղեցրել են այդ հիթ շքերթի առաջին հորիզոնականը։

Նա արժանացել է հինգ «Գրեմմիի»։ 2015 թվականին Հոլիվուդի «Փառքի պուրակում» բացվել է նրա անվանական աստղը։ -0-