Իվետա Մուկուչյանը կարող է «Եվրատեսիլ 2016»–ի թոփ մոդել դառնալ

ԵՐԵՎԱՆ, 18 ապրիլի. /Նովոստի–Արմենիա/. «Եվրատեսիլ 2016»–ի հայաստանյան ներկայացուցիչ Իվետա Մուկուչյանը «Եվրատեսիլ 2016»–ի երգի մրցույթի թոփ մոդելի կոչման քվեարկության առաջատարն է։ Քվեարկությունն անցկացվում է Wiwibloggs.com կայքում։

Իվետայի օգտին է քվեարկել ավելի քան 12 հազար մարդ կամ ձայների 32 տոկոսը։ Երկորրդ տեղում Ադրբեջանի ներկայացուցիչն է, երրորդում` Մալթայինը։

«Եվրատեսիլ-2016»-ը կկայանա մայիսի 10-ին, 12-ին և 14-ին Շվեդիայի մայրաքաղաք Ստոկհոլմում: Մրցույթի այս տարվա կարգախոսն է Come together (Միավորվենք):

Իվետա Մուկուչյանը LoveWave երգով հանդես կգա մայիսի 10–ին նախատեսված առաջին կիսաեզրափակչում և եզրափակիչ դուրս գալու համար կպայքարի Խորվաթիայի, Ֆինլանդիայի, Մոլդովայի, Հունաստանի, Հունգարիայի, Ռուսաստանի, Նիդեռլանդների, Սան Մարինոյի, Ադրբեջանի, Կիպրոսի, Մալթայի, Բոսնիա և Հերցեգովինայի, Էստոնիայի, Չեխիայի, Մոնտենեգրոյի, Իսլանդիայի, Ավստրիայի ներկայացուցիչների հետ։

Մայիսի 12–ին կայանալիք երկրորդ կիսաեզրափակչում ելույթ կունենան Լատվիայի, Բելառուսի, Իռլանդիայի, Շվեյցարիայի, Մակեդոնիայի, Ավստրալիայի, Լիտվայի, Լեհաստանի, Իսրայելի, Սերբիայի, Ալբանիայի, Բուլղարիայի, Դանիայի, Վրաստանի, Ռումինիայի, Սլովենիայի, Նորվեգիայի, Ուկրաինայի, Բելգիայի ներկայացուցիչները։
«Եվրատեսիլ 2016»–ի եզրափակիչը տեղի կունենա մայիսի 14–ին։–0–