Երևանում տեղի կունենա «Հայաստանի գլխավոր թատրոնը» խորագրով գալա համերգ

ԵՐԵՎԱՆ, 30 մայիսի. /Նովոստի-Արմենիա/. Մայիսի 30-ին Ալ. Սպենդիարյանի անվան օպերայի և բալետի ազգային ակադեմիական թատրոնում տեղի կունենա «Հայաստանի գլխավոր թատրոնը» խորագրով գալա համերգ, հաղորդում է ՀՀ մշակույթի նախարարության մամուլի ծառայությունը:

Համերգային երեկոյի ընթացքում թատրոնի արտիստները կներկայացնեն խաղացանկային ներկայացումներից հատվածներ, կթերթվեն թատրոնի անցած՝ ավելի քան ութսուն տարվա պատմության էջերը:

Ինչպես նշեցին Մշակույթի նախարարությունից, համաշխարհային մեծության օպերային աստղեր, բալետային հեղինակավոր խմբեր մեծագույն հպարտությամբ են ներկայանում հայաստանյան թատրոնի բեմում: Հայաստանի օպերային և բալետային արտիստներն էլ իրենց հերթին պարբերաբար ներկայանում են համաշխարհային լավագույն բեմերում ինչպես հայ, այնպես էլ համաշխարհային կոմպոզիտորների լավագույն գործերով:

«Ալ. Սպենդիարյանի անվան օպերայի և բալետի ազգային ակադեմիական թատրոնի ստեղծագործական անձնակազմն իր բարձր կատարողական արվեստը բազմիցս է ներկայացրել Հայաստանի սահմաններից դուրս, միջազգային ասպարեզում՝ հանրահռչակելով հայ դասական կոմպոզիտորական և կատարողական արվեստի նվաճումները»,- նշվում է մամուլի հաղորդագրության մեջ:

Ասվածի վառ ապացույցն է Ա. Խաչատրյանի «Գայանե» բալետի փայլուն ներկայացումը Սանկտ Պետերբուրգի Մարիինյան թատրոնում:

Ինչպես նշեցին մշակույթի նախարարությունից, վերջին տարիներին թատրոնը ծավալել է նաև հանրապետության մարզերի բնակչությանը դասական արվեստին հաղորդակցելու գործունեություն:

Սպենդիարյանի անվան օպերայի և բալետի ազգային ակադեմիական թատրոնը ստեղծվել է Հայկական ԽՍՀ խորհրդային ժողովրդական կոմիսարիատի 1932 թ.-ի մայիսի 13-ի որոշման համաձայն՝ Երևանի կոնսերվատորիայի օպերային դասարանի հիման վրա, իսկ 1933 թ.-ի հունվարի 20-ին տեղի է ունեցել առաջին պրեմիերան, ներկայացվել է Ալեքսանդր Սպենդիարյանի «Ալմաստ» օպերան:

Սպենդիարյանի անվան օպերայի և բալետի ազգային ակադեմիական թատրոնի ժամանակակից շենքը կառուցվել է 1940 թ.-ին՝ ճարտարապետ Ալեքսանդր Թամանյանի նախագծով:-0-