Հաղթանակի 70–ամյակին նվիրված գրական–երաժշտական երեկո կանցկացվի Երևանի Ռուսական արվեստի թանգարանում

ԵՐԵՎԱՆ, 4 մայիսի. /Նովոստի–Արմենիա/. Հայրենական մեծ պատերազմում տարած Հաղթանակի 70–ամյակին նվիրված գրական–երաժշտական երեկո կանցկացվի Երևանի Ռուսական արվեստի թանգարանում։

Միջոցառումը կկազմակերպվի Երևանում գիտության և մշակույթի ռուսական կենտրոնի հետ համատեղ։

Երեկոյի ընթացքում կհնչեն պատերազմի տարիներին և այն ժամանակ մեծ ճանաչում վայելող, ինչպես նաև ոչ շատ հայտնի բանաստեղծություններ և երգեր։

«Այդ բանաստեղծությունները ոգևորել են զինվորներին` Խորհրդային Միության բոլոր ժողովուրդների ներկայացուցիչներին, մարտերի միջև ընկած կարճատև դադարների ժամանակ, դրանք լսում էին տանը նրանց սպասող ծնողները, կանայք և երեխաները։ Հաղթանակն իսկապես մեկն էր` և ոչ միայն Խորհրդային Միության ժողովուրդների, այլ նաև բոլոր դաշնակից երկրների համար, մեկը` սպասված և ընդհանուր։ Երջանիկ և շատ դառը։ Ու թեև ասվում է, որ մուսաները լռում են, երբ կրակում են գնդացիրները, մեր երեկոն կոչված է հակառակն ապացուցել` պատերազմական ծանր տարիներին ստեղծված այդ բանաստեղծությունները և երգերն ամենաբարձր գեղարվեստական մակարդակով արտահայտում են մարդկային այնպիսի զգացումներ, ինչպես ցավն ու վճռականությունը, հաղթանակի սպասումը և հավատն առ հաղթանակ, ձեռքբերումների ուրախություն և կորստի վիշտ, թախիծ և սեր»,– նշել են միջոցառման կազմակերպիչները։

Հաղորդման մեջ ասվում է, որ գրական-երաժշտական երեկոն այնպես է կառուցված, որ ունկնդիրն կզգա իրեն արվեստի ուժով վերստեղծված հեռավոր այդ տարիների մթնոլորտում, կվերապրի իր ծնողներին և տատուպապերին բաժին ընկած դաժան փորձություններն ու հաղթանակի բերկրանքը:

Երեկոյի ընթացքում կցուցադրվեն Հայրենական Մեծ պատերազմում զոհված տաղանդավոր հայ նկարիչ Միքայել Սահակյանի ստեղծագործությունները և օրագիրը, որտեղ պատերազմական իր օրերն էր նկարագրում ու նկարազարդում զինվորը՝ հետագայում Հայաստանի վաստակավոր նկարիչ Սուրեն Պիպոյանը:

Բանաստեղծությունները կհնչեն Աննա Միքայելյանի կատարմամբ:

Երգեր կկատարեն Ստեֆանի Քոչարյանը, Սերգեյ Սարգսյանը։ -0-