ԵՐԵՎԱՆ, 5 հունիսի./Նովոստի–Արմենիա/. Հայաստանում Իրանի մշակույթի կենտրոնը 2014 թ.–ին հագեցած մշակութային ծրագիր է նախատեսել, «Նովոստի–Արմենիա» գործակալությանը տեղեկացրել է Իրանի Իսլամական Հանրապետության դեսպանատանը կից գործող Մշակույթի կենտրոնի նոր տնօրեն Մեջիդ Մեշքին։
«Այս տարի Հայաստանում մենք ավելի շատ միջոցառումներ կանցկացնենք, քան նախորդ տարիներին։ Մասնավորապես, նախատեսում ենք կազմակերպել Մշակույթի շաբաթ, Իրանական կինոյի շաբաթ, ինչպես նաև երեխաների և երիտասարդների համար նախատեսված տարբեր ծրագրեր», – ասել է նա հինգշաբթի Իրանում իսլամական հեղափոխության առաջնորդ Իմամ Հոմեյնիի մահվան 25–րդ տարելիցին նվիրված գիտաժողովի շրջանակներում։
Մեշքկին նաև նշել է, որ այդ միջոցառումների կազմակերպման նպատակով արդեն նախնական պայմանավորվածություններ են ձեռք բերվել ՀՀ մշակույթի նախարարության հետ։ Մշակութային միջոցառումների անցկացման կոնկրետ ամսաթվի մասին ԻԻՀ–ին կից Մշակույթի կենտրոնը կտեղեկացնի ավելի ուշ։
ԻԻՀ–ում իսլամական հեղափոխության հերթական տարեդարձի տոնակատարության շրջանակներում 2013 թ.–ի փետրվարին կազմակերպվել էին մի շարք մշակութային միջոցառումներ։
Մասնավորապես, Հայաստանի նկարիչների միությունում անցկացվեց Իրանի ժամանակակից արվեստի ցուցահանդես, Երևանի կապույտ մզկիթում առաջին անգամ անցկացվեց Իրանական ֆիլմերի շաբաթ, ինչպես նաև «Իրան և իսլամական հեղափոխություն» թեմայով հայ դպրոցականների աշխատանքների ցուցահանդես–մրցույթ։ Տեղի ունեցավ նաև Ժանեթ Լազարյանի «Իրանահայերի հանրագիտարան» գրքի շնորհանդեսը։–0–
